عمران خان اور حکومت کے درمیان ڈیل کی خبروں میں صداقت نہیں،بانی پی ٹی آئی کے ساتھ کوئی ڈیل نہیں ہوئی، بیرسٹرگوہر

اسلام آباد(اردوپوائنٹ اخبار تازہ ترین۔15 مئی 2025)پاکستان تحریک انصاف کے چیئرمین بیرسٹرگوہر نے کہا ہے کہ بانی پی ٹی آئی عمران خان اور حکومت کے درمیان ڈیل کی خبروں میں صداقت نہیں ، بانی پی ٹی آئی کے ساتھ کوئی ڈیل نہیں ہوئی، چیئرمین پی ٹی آئی بیرسٹر گوہرنے ڈیل کی خبروں کو مسترد کردیا، پارلیمنٹ ہاﺅس کے باہر میڈیا سے گفتگو کرتے ہوئے پاکستان تحریک انصاف کے چیئرمین کا کہنا ہے کہ بانی پی ٹی آئی عمران خان کی طرف سے کبھی بھی خفیہ مفاہمت یا سودے بازی کا کوئی عندیہ نہیں دیا گیا۔

جو بھی سیاسی عمل ہوگا وہ کھلے اور شفاف ڈائیلاگ کے ذریعے ہی ممکن ہوگا اور اس میں پارٹی کارکنان اور قائدین کی مشاورت بنیادی حیثیت رکھتی ہے۔ عمران خان کی ذاتی زندگی خصوصاً ان کے بیٹے قاسم اور سلیمان موجودہ حالات سے پوری طرح باخبر ہیں اور ان کی جانب سے بھی اس قسم کی کسی ڈیل کی سختی سے تردید کی گئی ہے۔

(جاری ہے)

انہوں نے کہا کہ بانی پی ٹی آئی کے بچوں نے بھی واضح طور پر کہہ دیا ہے کہ کوئی ڈیل نہیں کی گئی۔

قاسم سلیمان اپنے والد سے رابطے میں ہیں۔ بیرسٹرگوہر نے واضح کیا کہ عمران خان اور حکومت کے درمیان کسی بھی خفیہ معاہدے یا مفاہمت کی بات سراسر بے بنیاد ہے۔ بانی پی ٹی آئی عمران خان نے ہمیشہ مذاکرات کیلئے دروازے کھلے رکھے ہیں۔ بانی پی ٹی آئی سے میری اس حوالے سے کیا میٹنگ ہوئی وہ پارٹی کا اندرونی معاملہ ہے مگر عمران خان کبھی ڈیل نہیں کریں گے۔

بیرسٹر گوہر نے میڈیا سے گفتگو کے دوران بار بار اس بات پر زور دیا کہ عمران خان کی پوزیشن بالکل واضح ہے اور پارٹی کی قیادت ان کی ہدایت کے مطابق ہی تمام امور چلا رہی ہے۔چیئرمین پی ٹی آئی بیرسٹرگوہر نے اس موقع پر کہا کہ کسی نے اگر اپنے سورس سے خبر دی ہے تو اس کی مرضی ہے۔ میں نے بانی پی ٹی آئی سے ملاقات سے متعلق معاملات کسی کے ساتھ شیئر نہیں کئے۔

سیاسی معاملات کا حل صرف مذاکرات میں ہے اور تمام سٹیک ہولڈرز کو اس سمت میں سنجیدگی سے سوچنا ہوگا۔ان کا کہنا ہے کہ ہم ہر فورم پر بات چیت کے حامی ہیں لیکن ایسی کسی سودے بازی کا تصور بھی قابل قبول نہیں۔بیرسٹرگوہر کا یہ بھی کہنا ہے کہ بانی پی ٹی آئی عمران خان اس وقت ایک ناجائز اور ناحق قیدکا سامنا کر رہے ہیں اور ایسی صورت حال میں کسی ڈیل کی بات کرنا درست نہیں ہے۔

بانی پی ٹی آئی کا موقف روز اول سے یہی رہا ہے کہ ملک میں جاری سیاسی بحران کا حل صرف اور صرف سیاسی مذاکرات اور بات چیت سے نکلنا چاہیے نہ کہ پس پردہ معاہدوں سے۔ان کایہ بھی کہنا تھا کہ وزیراعظم کی جانب سے اسمبلی فلور پر مذاکرات کی دعوت کو مثبت انداز میں لیا گیا تاہم اس حوالے سے کوئی فیصلہ کرنے سے پہلے پارٹی مشاورت اور عمران خان کی رائے کو ترجیح دی جائے گی۔