ٹی ایم سیز کے ریٹائر ملازمین کے نمائندوں کی سجن یونین کے صدر سید ذوالفقارشاہ سے ملاقات،پینشن کیسز کی پیش رفت سے آگاہ کیا

کراچی(اُردو پوائنٹ اخبارتازہ ترین - این این آئی۔ 16 مئی2025ء)ٹی ایم سیز کے ریٹائر ملازمین کے پینشن کیسز کی پیش رفت کے سلسلے میں ملیر،کورنگی،ساوتھ اضلاع کے ریٹائر ملازمین کے نمائندوں اعظم خان،عظمت اللہ،پھول محمد،اسلم خان نے سجن یونین سی بی اے کے صدر سید ذوالفقارشاہ سے ملاقات کی اور انہیں پینشن کیسز جمع کرنے سے متعلق آگاہی فراہم کی اور اکتوبر 2023 سے قبل کے ریٹائرمنٹ کیسز تاحال التوا کا شکار بنانے پراپنی تشویش سے آگاہ کیا۔

سید ذوالفقارشاہ نے انہیں توہین عدالت کے نوٹس کے اجرا کی کاروائی سے آگاہ کیا۔اور انہیں بتایا کہ کے ایم سی میں بھیجے گئے 1296 کیسز کو ویلیفئر ڈیپارٹمنٹ نے انٹرنل آڈٹ کو پینشن فکیسیشن کے لیے بھیج دیئے ہیں اس سلسلے میں انہیں آگاہ کیا۔

(جاری ہے)

اور ڈائریکٹر ویلیفئر کے ایم سی سے مسلسل رابطے میں رہنے سے آگاہ کیا۔ اور انہیں بتایا کہ پینشن کی ادائیگی کیلیے شبانہ روز کوششیں جاری ہیں۔

ریٹائر ملازمین کے نمائندوں نے کہا کہ کچھ عناصر پینشن کے معاملے کو سیاست کی بھینٹ چڑھاکر اپنے مذموم مقاصد حاصل کرنے کی ناکام کوشش کررہے ہیں۔انہوں مذید کہا کہ ہم 2008 سے سجن یونین کی پینشن کی ادائیگی میں باقاعدگی لانے اور ڈی ایم سیز کے زمے 48 ماہ کی ادائیگیاں دو ارب55لاکھ حکومت سندھ سے اقساط میں 2015 سے کروانے میں سجن یونین کے کردار کو قدر کی نگاہ سے دیکھتے ہیں۔

منتخب نمائندوں اور سیاستدانوں نے ریٹائر و وفات یافتہ ملازمین کو سوائے ذلیل وخوار کرنے کے کچھ نہیں کیا۔صرف سجن یونین نے ریٹائر وحاضر سروس ملازمین کی تنخواہوں ،پینشن،واجبات کی ادائیگی میں عملی اور فعال کردار ادا کرکے ہر ماہ 65 کروڑ کی اسپیشل گرانٹ،39 کروڑ 97 لاکھ کی براہ راست کٹوتی کے ایم سی کو جاری کروائی ہے۔جس کی وجہ سے آج ملازمین کو باقاعدگی سے تنخواہیں اور ریگولر 24 ہزار سے زائد پینشنرز کو ماہانہ پینشن ادا کی جارہی ہے۔

سید ذوالفقارشاہ نے کہا کہ ٹی ایم س کے ریٹائر ملازمین کے پینشن کیسز فائنل ہونے پر انہیں پینشن کی ادائیگی انشا اللہ شروع کروادی جائے گی۔ریٹائر ایمپلائز نے کراچی کے عوامی نمائندوں اور سیاسی جماعتوں کے اس سلسلے میں منفی کردار پر مایوسی کا اظہار کرتے ہوئے کہا کہ غیر سیاسی یونین ہونے کے باوجود سجن یونین نے کراچی کے بلدیاتی ملازمین کیلیے گزشتہ 25 برسوں سے جو عملی کرداراحتجاجوں،مظاہروں،دھرنوں اور عدالتوں کے ذریعے ادا کیا ہے۔وہ لائق دادوتحسین ہے۔سید ذوالفقارشاہ نے انہیں یقین دلایا کہ سجن یونین بلاتفریق رنگ ونسل کراچی سمیت صوبے بھر کے بلدیاتی ملازمین کے حقوق کی جنگ لڑتی رہی ہے اور لڑتی رہے گی۔چاہے اس کے لیے کوئی بھی قربانی دینی پڑے۔