کھیلوں کے شعبے میں پاکستان کے اندر یا عالمی سطح پر نام روشن کرنے والے کھلاڑیوں کے لئے کیش ایوارڈ 20 ملین تک بڑھا دیا گیا ہے ، حکومت باصلاحیت کھلاڑیوں کی بھرپور حوصلہ افزائی کے لیے اقدامات جاری رکھے گی ، رانا ثناء اللہ خان

اسلام آباد (اُردو پوائنٹ اخبارتازہ ترین - اے پی پی۔ 16 مئی2025ء) وزیراعظم کے مشیر برائے بین الصوبائی رابطہ رانا ثناء اللہ خان نے کہا ہے کہ کھیلوں کے شعبے میں پاکستان کے اندر یا عالمی سطح پر نام روشن کرنے والے کھلاڑیوں کے لئے ہزاروں روپے نقد انعام کو بڑھا کر ایک ملین تا 20 ملین کر دیا گیا ہے ، حکومت باصلاحیت کھلاڑیوں کی بھرپور حوصلہ افزائی کے لیے اقدامات جاری رکھے گی تاکہ پاکستان کھیلوں کے میدان میں عالمی سطح پر مزید کامیابیاں حاصل کرے۔

وہ جمعہ کو یہاں پاکستان سپورٹس بورڈ کی جانب سے کھلاڑیوں کو نقد انعامات دینے کی تقریب سے خطاب کر رہے تھے ۔ وفاقی سیکرٹری بین الصوبائی رابطہ محی الدین وانی ، ڈائریکٹر جنرل پاکستان سپورٹس بورڈ یاسر پیر زادہ کے علاوہ مختلف فیڈریشنز کے نمائندے اور کھلاڑیوں کی کثیر تعداد موجود تھی ۔

(جاری ہے)

وزیراعظم کے مشیر رانا ثناء اللہ خان نے 32 کھلاڑیوں اور کوچز میں 2 کروڑ 7 لاکھ سے زائد کے کیش ایوارڈ تقسیم کیے ۔

وزیراعظم کے مشیر رانا ثناء اللہ خان نے کہا کہ اولمپیکس میں ارشد ندیم کی جانب سے شاندار کامیابی کے بعد وزیراعظم نے ارشد ندیم کو وزیراعظم ہائوس بلوا کر انھیں زبر دست خراج تحسین پیش کر کے کھلاڑیوں کی عزت دی ہے ۔ وزیراعظم کی ہدایات پر ملک گیر سطح پر کھیلوں کے فروغ کے لئے متعدد اقدامات اٹھائے گئے ہیں ۔پاکستان سپورٹس بورڈ کی جانب سے کھلاڑیوں کے لئے بہت سی سہولیات کو اپ گریڈ کیا گیا ہے۔

بین الاقوامی ، قومی اور علاقائی سطح پر کھیلوں میں نمایاں پوزیشن حاصل کرنے والے کھلاڑیوں کے لئے نقد انعامات کی مالیت میں خاطر خواہ اضافہ کیا گیا ہے ۔ڈائریکٹر جنرل پاکستان سپورٹس بورڈ یاسر پیرزادہ نے کہا کہ کیش ایوارڈز میں اضافے کے فیصلے پر عملی عمل درآمد کرتے ہوئے یہ کیش انعامات دیئے جا رہے ہیں اور یہ سلسلہ مستقبل میں بھی جاری رکھا جائے گا تاکہ نوجوان کھلاڑی مزید محنت اور لگن سے ملک کی نمائندگی کریں۔

وزیراعظم کے مشیر رانا ثناء اللہ خان نے وفاقی سیکرٹری محی الدین وانی اور ڈی جی پی ایس بی یاسر پیرزادہ کے ہمراہ برونز میڈلز جیتنے والے انیس علی شاہ، عبداللہ نواز، سکھی اللہ ترین اور نعمان خان کو فی کس 3 لاکھ 75 ہزار روپے، کوچز فہیم گل خان اور فراز احمد کو فی کس 1 لاکھ 25 ہزار روپے جبکہ گولڈ میڈل جیتنے پر نور زمان کو 50 لاکھ روپے اور ان کے کوچنگ سٹاف کو فی کس 8 لاکھ 33 ہزار 333 روپے ،انٹرنیشنل تائیکوانڈو چیمپئن شپ 2025 میں گولڈ، سلور اور برونز میڈلز حاصل کرنے والے کھلاڑیوں ہارون خان، ابوبکر صدیق، شاہ زیب خان، غلام محمد، محمد طیب، نعمان خان، حسین انجم، مظہر عباس، فیضان جنید، اور فاطمتہ الزہرہ سمیت کوچنگ سٹاف کو بھی لاکھوں روپے کے نقد انعامات سے نوازا گیا۔