Live Updates

سری لنکن وکٹ کیپر بیٹر کوسال پریرا ایک بار پھر لاہور قلندرز کا حصہ بن گئے

ہفتہ 17 مئی 2025 22:47

لاہور (اُردو پوائنٹ اخبارتازہ ترین - این این آئی۔ 17 مئی2025ء)سری لنکن وکٹ کیپر بیٹر کوسال پریرا ایک بار پھر لاہور قلندرز اسکواڈ میں شامل ہو گئے ہیں۔ وہ ٹیم کے اہم ایچ بی ایل پی ایس ایل 2025ء میچ سے قبل ہفتہ کی صبح لاہور پہنچے، جہاں قلندرز کل (اتوار)18مئی کو پشاور زلمی کے خلاف میدان میں اتریں گے۔کوسال پریرا کے ہمراہ دو دیگر غیر ملکی کھلاڑی شکیب الحسن اور بھانوکا راج پکشا بھی لاہور پہنچے۔

شکیب اور راج پکشا کو انجری کے باعث باہر ہونے والے ٹام کرن اور ڈیرل مچل کی جگہ اسکواڈ میں شامل کیا گیا ہے۔34سالہ پریرا ٹی ٹونٹی کرکٹ میں اپنی دھواں دار بیٹنگ اور وسیع تجربے کے باعث جانے جاتے ہیں۔ وہ اب تک 4,500سے زائد رنز بنا چکے ہیں، اور گزشتہ دو سالوں میں ان کا اسٹرائیک ریٹ 151.33رہا ہے، جو ان کی جارحانہ فارم کا ثبوت ہے۔

(جاری ہے)

لاہور پہنچنے پر کوسال پریرا نے خوشی کا اظہار کرتے ہوئے کہا کہ لاہور قلندرز کے ساتھ دوبارہ جڑ کر بہت اچھا محسوس ہو رہا ہے۔

میں ہمیشہ پی ایس ایل میں کھیلنے سے لطف اندوز ہوا ہوں، اور اس اہم موقع پر ٹیم میں واپس آنا میرے لیے اعزاز کی بات ہے۔ میں ہر ممکن کوشش کروں گا کہ ٹیم کے لیے کارآمد ثابت ہو سکوں اور شائقین کو خوشی دے سکوں۔ اب ہوٹل میں ٹیم سے ملاقات کا انتظار ہے تاکہ ایک ساتھ آگے بڑھا جا سکے۔لاہور قلندرز کے ٹیم ڈائریکٹر ثمین رانا نے پریرا کا خیرمقدم کرتے ہوئے کہا کہ ہم کوسال کے مشکور ہیں کہ وہ ٹورنامنٹ کے اس اہم مرحلے پر دوبارہ دستیاب ہوئے۔

ان کا تجربہ اور اینرجی ٹیم کے لیے ایک بڑا اضافہ ہے، اور ہمیں خوشی ہے کہ وہ ایک بار پھر قلندرز کے رنگوں میں نظر آئیں گے۔واضح رہے کہ ایچ بی ایل پی ایس ایل 2025کو 10مئی کو بھارت کے ساتھ سرحدی کشیدگی کے باعث عارضی طور پر ملتوی کر دیا گیا تھا، جس کے بعد اب یہ ٹورنامنٹ 17مئی سے دوبارہ شروع ہو رہا ہے جبکہ فائنل 25مئی کو قذافی اسٹیڈیم لاہور میں کھیلا جائے گا۔