Live Updates

پاکستان کے 24 کروڑ عوام کا پانی روکنے کا خیال صرف کوئی پاگل شخص ہی کرسکتا ہے، ڈی جی آئی ایس پی آر

میں امید کرتا ہوں کہ وہ وقت نہ آئے لیکن اگر ایسا ہوا تو دنیا ان اقدامات کو دیکھے گی اور ان کے ایسے نتائج ہوں گے جن کے لیے ہمیں برسوں اور دہائیوں تک لڑنا پڑے گا؛ لیفٹیننٹ جنرل احمد شریف چوہدری کا انٹرویو

ساجد علی اتوار 18 مئی 2025 20:31

پاکستان کے 24 کروڑ عوام کا پانی روکنے کا خیال صرف کوئی پاگل شخص ہی کرسکتا ..

راولپنڈی ( اُردو پوائنٹ اخبارتازہ ترین۔ 18 مئی2025ء ) ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان کے 24 کروڑ عوام کا پانی روکنے کا خیال صرف کوئی پاگل شخص ہی کرسکتا ہے۔ عرب نیوز کو دیئے گئے انٹرویو میں انہوں نے کہا کہ اگر پاکستان کے پانی کو روکنے کی کوشش کی تو اس کے سنگین نتائج ہوں گے، پاکستان کے 24 کروڑ عوام کا پانی روکنے کا خیال صرف کوئی پاگل شخص ہی کرسکتا ہے، میں امید کرتا ہوں کہ وہ وقت نہ آئے لیکن اگر ایسا ہوا تو دنیا ان اقدامات کو دیکھے گی اور ان کے ایسے نتائج ہوں گے جن کے لیے ہمیں برسوں اور دہائیوں تک لڑنا پڑے گا۔

ڈی جی آئی ایس پی آر کا کہنا ہے کہ بھارت کے 6 طیارے تباہ ہوئے جن میں ایک میراج 2000 بھی شامل ہے، ہم نے صرف طیاروں کو نشانہ بنایا، ہم مزید بھی مار سکتے تھے لیکن ہم نے تحمل کا مظاہرہ کیا، پاکستان کی فوج قومی مفادات کے تحفظ کے لیے ہمہ وقت تیار ہے اور اگر بھارت نے پانی کو ہتھیار بنایا تو اس کے خلاف بھرپور ردعمل دیا جائے گا، پاکستان کی مسلح افواج ایک پیشہ ور ادارہ ہے جو سیاسی حکومت کی ہدایات اور بین الاقوامی معاہدوں کی مکمل پاسداری کرتی ہے۔

(جاری ہے)

لیفٹیننٹ جنرل احمد شریف چوہدری نے تصدیق کرتے ہوئے کہا کہ جنگ بندی اب تک قائم ہے اور دونوں طرف سے اعتماد سازی کے اقدامات کے تحت رابطے موجود ہیں، اگر کوئی خلاف ورزی ہوتی ہے تو ہمارا جواب ہمیشہ تیار ہوتا ہے لیکن وہ صرف اُن پوزیشنز پر ہوتا ہے جہاں سے خلاف ورزی کی جاتی ہے، ہم کبھی بھی شہریوں یا ان کے بنیادی ڈھانچے کو نشانہ نہیں بناتے، تاہم جب تک بھارت مذاکرات کی میز پر نہیں آتا تب تک خطے میں کشیدگی کا خطرہ برقرار رہے گا۔