Live Updates

بھارت،آپریشن سندور پر ٹوئٹ کرنے پر مسلمان پروفیسر گرفتار

سربراہ آل انڈیا مجلس اتحاد المسلمین اسد الدین اویسی کی علی خان کی گرفتاری کی مذمت یونیورسٹی اساتذہ اور عوامی شخصیات کی رائے پر ایسے اقدامات سے علمی آزادی کو خطرہ لاحق ہو سکتا ہے،سیاسی رہنما،ماہرین تعلیم

اتوار 18 مئی 2025 22:05

نئی دہلی(اُردو پوائنٹ اخبارتازہ ترین - این این آئی۔ 18 مئی2025ء)بھارت میں آپریشن سندور پر سوال اٹھانے اور کرنل صوفیہ سے متعلق ٹوئٹ کرنے پر یونیورسٹی کے مسلمان پروفیسر کو گرفتار کر لیا گیا۔رپورٹ کے مطابق بھارتی پولیس نے ریاست ہریانہ کی اشوکا یونیورسٹی کے ایسوسی ایٹ پروفیسر علی خان محمود آباد کو دہلی میں ان کے گھر سے گرفتار کر لیا، انہیں آپریشن سندور سے متعلق بیان دینے پر گرفتار کیا گیا۔

پروفیسر علی خان محمود آباد کو بھارتیہ جنتا پارٹی (بی جے پی)یوتھ ونگ کے رکن کی شکایت پر حراست میں لیا گیا جبکہ ہریانہ ریاستی خواتین کمیشن نے بھی ان کے ریمارکس پر انہیں نوٹس جاری کیا تھا۔ایسوسی ایٹ پروفیسر علی خان محمود آباد نے ٹویٹ کیا تھا جس میں انہوں نے کرنل صوفیہ قریشی کو سراہنے والے دائیں بازو کے حامیوں پر سوال اٹھایا تھا کہ انہیں مجمعے کے تشدد اور زبردستی گھر گرائے جانے کے متاثرین کی بھی حمایت کرنی چاہیے۔

(جاری ہے)

آل انڈیا مجلسِ اتحاد المسلمین کے سربراہ اسد الدین اویسی نے علی خان کی گرفتاری کی مذمت کرتے ہوئے کہا ہے کہ ان کی پوسٹ نہ تو ملک کے خلاف ہے اور نہ خواتین کے، یہ محض ایک رائے تھی، جس پر گرفتاری کا عمل آزادی اظہار رائے پر حملہ ہے، ہریانہ پولیس نے دہلی سے گرفتاری کر کے قانونی عمل کی خلاف ورزی کی ہے۔سیاسی رہنماؤں اور ماہرین تعلیم نے پروفیسر کے حق میں آواز بلند کرتے ہوئے کہاکہ یونیورسٹی اساتذہ اور عوامی شخصیات کی رائے پر ایسے اقدامات جمہوری اقدار کے منافی ہیں اور اس سے علمی آزادی کو خطرہ لاحق ہو سکتا ہے۔