بلوچستان میں قلعہ عبداللّٰہ ایف سی قلعے کے قریب دھماکہ، 4 افراد شہید 20 زخمی

دہشت گرد بظاہر ایف سی قلعے کی دیوار کو اڑانا چاہتے تھے، دھماکے سے متعدد گاڑیاں اور دکانیں تباہ ہوئی ہیں، دھماکے سے جبار مارکیٹ کی متعدد دکانیں گر گئیں؛ ڈپٹی کمشنر ریاض خان

ساجد علی اتوار 18 مئی 2025 22:22

بلوچستان میں قلعہ عبداللّٰہ ایف سی قلعے کے قریب دھماکہ، 4 افراد شہید ..

کوئٹہ ( اُردو پوائنٹ اخبارتازہ ترین۔ 18 مئی2025ء ) بلوچستان میں قلعہ عبداللّٰہ ایف سی قلعے کے قریب دھماکے میں 4 افراد شہید ہوگئے۔ میڈیا رپورٹس کے مطابق صوبہ بلوچستان کے ضلع قلعہ عبداللّٰہ میں ایف سی قلعے کے قریب دھماکہ ہوا ہے جس میں 4 افراد شہید اور 20 زخمی ہوئے ہیں، ڈپٹی کمشنر ریاض خان نے بتایا کہ دہشت گرد بظاہر ایف سی قلعے کی دیوار کو اڑانا چاہتے تھے، دھماکے میں 20 افراد زخمی ہوئے جنہیں فوری مختلف ہسپتالوں میں منتقل کردیا گیا۔

ان کا کہنا ہے کہ ایف سی قلعے کی عقبی دیوار کے ساتھ مارکیٹ بھی ہے، دھماکے سے متعدد گاڑیاں اور دکانیں تباہ ہوئی ہیں، دھماکے سے جبار مارکیٹ کی متعدد دکانیں گر گئیں، کئی دکانوں میں آگ بھی لگ گئی، دھماکے سے قریبی مارکیٹ میں زیادہ جانی و مالی نقصان ہوا ہے، علاقے میں ہیلتھ سہولتوں کی کی کمی کے باعث زخمیوں کو کوئٹہ منتقل کیا جا رہا ہے۔

(جاری ہے)

ڈپٹی کمشنر کا کہنا ہے کہ دھماکے کے وقت قبائلی رہنما حاجی فیض اللّٰہ خان غبیزئی اپنے دفتر میں موجود تھے تاہم وہ اس دھماکے مین محفوظ رہے، زخمیوں میں ان کے گارڈ اور راہ گیر شامل ہیں، دھماکے کے بعد مسلح افراد اور ایف سی اہلکاروں میں فائرنگ کا تبادلہ ہوا، علاقے کو سیل کرکے سرچ اور کلیئرنس آپریشن شروع کر دیا گیا۔ علاوہ ازیں بلوچستان میں چمن کے علاقے گلستان میں ایک مارکیٹ میں بھی دھماکا ہوا جس کے نتیجے میں 4 افراد شہید اور 8 زخمی ہوئے، گلستان کے علاقے میں فوڈ پوائنٹ کے قریب ہونے والا یہ ریموٹ کنٹرول دھماکہ تھا جس کے لیے دھماکہ خیز مواد موٹر سائیکل میں چھپایا گیا تھا، دھماکے کی اطلاع ملتے ہی پولیس اور دیگر سیکیورٹی وتحقیقاتی ادارے اور ریسکیو ادارے جائے حادثہ پر پہنچ گئے اور امدادی سرگرمیاں شروع کردی گئیں، لاشوں اور زخمیوں کو کوئٹہ اسپتال منتقل کردیا گیا جب کہ سکیورٹی اور تحقیقاتی اداروں نے علاقہ کو گھیرے میں لے کر شواہد جمع کرنا شروع کردیئے۔