پوپ لیو کی قیادت مذاہب کے درمیان ہم آہنگی کی امید کو تقویت دے گی ، کھیل داس کوہستانی

پیر 19 مئی 2025 11:54

روم (اُردو پوائنٹ اخبارتازہ ترین - اے پی پی۔ 19 مئی2025ء) وزیر مملکت برائے مذہبی امور کھیل داس کوہستانی نے کہا ہے کہ پوپ لیو کی قیادت تمام مذاہب کے درمیان ہم آہنگی کی امید کو تقویت دے گی اور ان کی آوازدنیا بھر میں انصاف اور ہمدردی کےلئے اپنا کردار ادا کرے گی۔ وزارت مذہبی امور کے ترجمان کی طرف سے جاری ایک بیان میں کہا گیا ہے کہ پوپ لیو کی یادگاری تقریب میں پاکستان کی طرف سے چیئرمین سینیٹ سید یوسف رضا گیلانی، وزیر مملکت برائے مذہبی امور کھیل داس کوہستانی اور صوبائی وزیر اقلیتی امور پنجاب رمیش سنگھ اروڑہ نے شرکت کی۔

پوپ لیو کی 267 ویں یادگاری تقریب میں شرکت کے موقع پر وزیر مملکت برائے مذہبی امور کھیل داس کوہستانی نے پوپ لیو کے اتحاد کے پیغام کو سراہا اور کہا کہ ان کا دور اقتدار عالمی امن اور بین المذاہب ہم آہنگی کے لئے امید کی کرن ہے۔

(جاری ہے)

انہوں نے پوپ لیو کو پاکستان کے عوام کی طرف سے مبارکباد پیش کی اور کہا کہ پوپ لیو کی آواز انصاف اور ہمدردی کے حوالے سے تمام مذاہب میں اپنا کردار ادا کرے گی۔ انہوں نے کہا کہ پوپ لیو پاکستان کے سرکاری دورے کے خواہشمند ہیں ۔ وزیراعظم کی ہدایت پر پاکستانی وفد کی اس تقریب میں موجودگی امن اور بقائے باہمی کی مشترکہ اقدار کا ثبوت ہے۔ انہوں نے کہا کہ پوپ لیو کی قیادت بین المذاہب ہم آہنگی کی امید کو تقویت دے گی۔