Live Updates

پاکستان سپر لیگ ‘ راولپنڈی اسٹیڈیم میں ''پنک ڈے’’منایا گیا

پیر 19 مئی 2025 12:29

راولپنڈی(اُردو پوائنٹ اخبارتازہ ترین - این این آئی۔ 19 مئی2025ء)پاکستان سپر لیگ میں صحت سے متعلق مسائل پر شعور اجاگر کرنے کی روایت کو برقرار رکھتے ہوئے پیر کو راولپنڈی کرکٹ اسٹیڈیم میں ''پنک ڈے’’منایا گیا۔ یہ دن چھاتی کے سرطان سے آگاہی کی مہم کا حصہ ہے جس کا مقصد خواتین میں بریسٹ کینسر سے متعلق شعور اجاگر کرنا اور اس کی بروقت تشخیص کی اہمیت کو اجاگر کرنا ہے۔

پی ایس ایل 10 کا آخری لیگ میچ اسلام آباد یونائیٹڈ اور کراچی کنگز کے درمیان کھیلا گیا۔ پی سی بی کی طرف سے جاری اعلامیے کے مطابق یہ میچ ایک خاص موقع ہو گا کیونکہ اسٹیڈیم کو گلابی رنگ سے روشن کیا گیا۔پی ایس ایل کی کارپوریٹ سوشل رسپانسبلٹی کے تحت یہ اقدام پنک ربن مہم کی حمایت میں کیا جا رہا ہے تاکہ چھاتی کے کینسر سے متعلق شعور اجاگر کیا جا سکے۔

(جاری ہے)

اس سے قبل 3 مئی کو قذافی اسٹیڈیم لاہور میں کوئٹہ گلیڈی ایٹرز اور اسلام آباد یونائیٹڈ کے درمیان میچ کے دوران ''چائلڈ کینسر’’آگاہی کا دن بھی منایا گیا تھا۔ پی ایس ایل کے چیف ایگزیکٹو آفیسر سلمان نصیر کا کہنا ہے کہ پی ایس ایل نے ہمیشہ صحت سے متعلق مسائل پر شعور اجاگر کرنے اور فلاحی مقاصد کے لیے اپنی ذمہ داری نبھائی ہے۔چھاتی کا کینسر کئی زندگیاں متاثر کرتا ہے اس لیے اس کی جلد تشخیص اور متاثرہ افراد کی مدد انتہائی ضروری ہے۔

جیسے ہم نے بچوں کے کینسر سے متعلق آگاہی کا دن منایا اسی طرح اب ہم ایک بار پھر پی ایس ایل کے پلیٹ فارم سے چھاتی کے کینسر کے بارے میں شعور اجاگر کرنا چاہتے ہیں۔ انہوں نے شائقین سے اپیل کی کہ وہ گلابی لباس پہن کر اسٹیڈیم آئیں اور اس مہم کا حصہ بنیں۔