اُردو کے معروف ناول نگار نسیم حجازی کا یوم پیدائش منایا گیا

اسلام آباد (اُردو پوائنٹ اخبارتازہ ترین - اے پی پی۔ 19 مئی2025ء) اردو کے معروف ناول نگار نسیم حجازی کا یوم پیدائش پیر 19 مئی کو منایا گیا ۔نسیم حجازی اردو ادب میں تاریخی ناول نگاری کی صف میں اہم مقام رکھتے ہیں۔ نسیم حجازی کا اصل نام شریف حسین تھا لیکن وہ زیادہ تر اپنے قلمی نام ”نسیم حجازی“ سے معروف ہیں۔ وہ تقسیم ہند سے قبل پنجاب کے ضلع گرداسپور میں19 مئی 1914میں پیدا ہوئے۔

قیام پاکستان کے بعد ان کا خاندان ہجرت کر کے پاکستان منتقل ہو گیا ۔ان کے ناول مسلمانوں کے عروج و زوال کی تاریخ پر مبنی ہیں جنہوں نے اردو خواں طبقے کی کئی نسلوں پر گہرے اثرات مرتب کئے ہیں۔نسیم حجازی نے صرف تاریخی واقعات کو ہی قلمبند نہیں کیا بلکہ حالات کی ایسی منظر کشی کی کہ قاری خود کو کہانی کا حصہ محسوس کرنے لگتا ہے اور ناول کے کرداروں کے مکالموں سے براہ راست اثر بھی لیتا ہے۔

(جاری ہے)

نسیم حجازی نے اپنی عملی زندگی کا آغاز صحافت کے شعبے سے کیا اور ہفت روزہ تنظیم کوئٹہ،روزنامہ حیات کراچی، روزنامہ زمانہ کراچی، روزنامہ تعمیراور روزنامہ کوہستان راولپنڈی سے وابستہ رہے۔ انہوں نے بلوچستان اور شمالی سندھ میں تحریک پاکستان کو مقبول عام بنانے میں تحریری جہاد کیا اور بلوچستان کو پاکستان کا حصہ بنانے میں فعال کردار بھی ادا کیا۔

نسیم حجازی کی اصل وجہ شہرت ان کی تاریخی ناول نگاری ہے۔انکی مشہور تصانیف میں داستان مجاہد، انسان اور دیوتا، محمد بن قاسم، آخری چٹان، شاہین، خاک اور خون، یوسف بن تاشقین، آخری معرکہ، معظم علی اور تلوار ٹوٹ گئی، قیصر و کسریٰ، قافلہ حجاز اور اندھیری رات کے مسافر وغیرہ شامل ہیں۔ اس کے علاوہ انہوں نے طنز و مزاح کے موضوع پر پورس کے ہاتھی، ثقافت کی تلاش، سفید جزیدہ اور سوسال بعد نامی کتب بھی تحریر کیں۔

ان کا ایک سفر نامہ پاکستان سے دیار حرم تک بھی شائع ہوچکا ہے۔نسیم حجازی کی تصانیف کا متعدد زبانوں میں ترجمہ کیا جا چکا ہے جبکہ ان کی تحریروں پر مشتمل آخری چٹان اور شاہین کے نام سے دو ڈرامہ سیریلز بھی نشر ہوئےجبکہ نسیم حجازی کے ایک اور ناول خاک اور خون پر فلم بھی بنائی گئی ہے۔ نسیم حجازی کو حکومت کی جانب سے تمغہ برائے حسن کارکردگی سمیت مختلف قومی و بین الاقوامی ایوارڈ ز سے بھی نوازا گیا۔ نسیم حجازی 2 مارچ 1996کو 82 سال کی عمر میں راولپنڈی میں وفات پا گئے تھے اور ان کو اسلام آباد کے مرکزی قبرستان میں دفن کیا گیا۔نسیم حجازی کے یوم پیدائش کے موقع پر علمی ،ادبی و صحافتی حلقوں کی جانب سے ان کی خدمات کے اعتراف میں انہیں خراج تحسین پیش کیا گیا۔