بارڈر سے واپسی پر پاک فوج کے دستوں کا زندہ دلان لاہور کی جانب سے پر تپاک استقبال

لاہور ( اُردو پوائنٹ اخبارتازہ ترین۔ 19 مئی 2025ء ) بھارت کے ساتھ جنگ کے بعد بارڈر سے واپسی پر پاک فوج کے دستوں کا زندہ دلان لاہور کی جانب سے پر تپاک استقبال کیا گیا۔ تفصیلات کے مطابق لاہور کے شہریوں کی جانب سے پاک فوج کے جوانوں اور ٹینکوں پر پھولوں کی برسات کی گئی، شہریوں نے آپریشن بنیان مرصوص کی کامیابی پر پاک فوج کو خراج تحسین پیش کیا، قومی پرچم اٹھائے شہری فخر اور خوشی سے جھوم اٹھے، شہریوں کی بڑی تعداد نے قومی پرچم تھامے، پاک فوج زندہ باد کے نعروں اور محبت بھرے کلمات کے ساتھ جوانوں کا خیرمقدم کیا، اس موقع پر جشن کا سماں دیکھا گیا، شہریوں نے والہانہ محبت کا اظہار کرتے ہوئے ہمیشہ پاک فوج کے ساتھ کھڑے رہنے کا عزم دہرایا۔

علاوہ ازیں آپریشن بنیان مرصوص پر مسلح افواج کی ستائش کا سلسلہ عالمی سطح پر بھی جاری ہے نیویارک ٹائمز نے اس کو پاکستان کی بڑی کامیابی قرار دیدیا، اس حوالے سے نیویارک ٹائمز میں شائع ایک مضمون میں کہا گیا ہے کہ پاکستان طویل عرصے سے سیاسی، اقتصادی اور سلامتی کے بحرانوں میں گھرا ہوا تھا، بھارت کی جارحیت کے خلاف آپریشن ’بنیان مرصوص‘ میں بڑی فتح نے یکا یک سب کچھ بدل کر رکھ دیا۔

(جاری ہے)

نیویارک ٹائمز کا کہنا ہے کہ بھارت کے ساتھ بڑی فوجی جھڑپ میں پاکستان کی کامیابی سے پاکستانی مسلح افواج کے وقار میں مزید اضافہ ہوا، پاکستانی مسلح افواج کی جیت پر ان کے حق میں ریلیاں بھی نکالیں گئیں، پاکستان اور بھارت کے درمیان حالیہ تنازع نے عوامی جذبات میں تبدیلی کی لہر پیدا کی ہے، اس حوالے سے پاکستانی شہری کہتے ہیں کہ ایسا محسوس ہوتا ہے ہم نے کچھ جیت لیا ہے اب ہم ناکام ریاست نہیں ہیں، تمام منفی پروپیگنڈے کے باوجود پاکستان کی مسلح افواج نے اپنی طاقت اور اثر و رسوخ کو مزید مستحکم کیا ہے۔

نیویارک ٹائمز نے لکھا کہ بھارت نے پہلگام فالس فلیگ آپریشن کا الزام پاکستان پر عائد کرکے جارحیت کا آغاز کیا، پاک فضائیہ نے آپریشن ’بنیان مرصو ص‘ میں بھارتی لڑاکا طیاروں کو زمین بوس کرکے سب کو حیران کیا، پاکستان کی مسلح افواج کی جانب سے منہ توڑ جواب اور بڑی جنگ سے بچنے کے لیے پاکستان نے بھارتی سیز فائر کی پیشکش کو قبول کیا، آپریشن بنیان مرصوص کی کامیابی مسلح افواج بالخصوص جنرل سید عاصم منیر کی قیادت پر اعتماد کو بحال کرتی ہے، بھارتی جارحیت کے منہ توڑ جواب کے بعد جنرل سید عاصم منیر قومی نجات دہندہ کے طور پر ابھرے، اس قسم کی فتوحات فوج کی پیشہ ورانہ طاقت کو سیاسی اثر و رسوخ سے زیادہ تقویت دیتی ہیں۔