Live Updates

بھارت منہ کی کھانے کے بعد دوبارہ جنگ کرنے سے پہلے سوبار سوچے گا،ڈاکٹرروبینہ اختر

پیر 19 مئی 2025 17:36

ملتان (اُردو پوائنٹ اخبارتازہ ترین - اے پی پی۔ 19 مئی2025ء) تحریک انصاف کی رہنما ڈاکٹر روبینہ اختر نے کہا ہے کہ پاکستان نے حالیہ جنگ میں 10 مئی کی صبح کو انڈیا کے منہ پرشکست کا جو تھپڑ مارا ہے بھارت ابھی تک اپنےگال سہلا رہا ہے۔ان خیالات کا اظہار انہوں نے منعقدہ تقریب سے خطاب کرتے ہوئے کیا۔

(جاری ہے)

انہوں نے کہا کہ انٹرنیشنل میڈیا نے بھی بھارتی میڈیا کا جنگ کے دوران جھوٹ اورغلط بیانی پر پردہ اٹھایا ہےجو کہ ان کی شرمندگی کا باعث بن رہا ہے،اگرچہ اب بھی بھارتی رہنما خفت مٹانے کے لیے دوبارہ جنگ کی دھمکیاں دے رہا ہے لیکن جنگ میں پاکستان سے منہ کی کھانے کے بعد وہ دوبارہ جنگ چھیڑنے کے لیے سو بار سوچے گا۔

ڈاکٹر روبینہ اختر نے کہا کہ ہمارے دوست ممالک چین ، ترکیہ، عرب ممالک ، ایران اور آذربائیجان نے جس طرح ہمارا ساتھ دیااس پر پوری قوم ان کی شکرگزار ہے۔ہم اپنی افواج کو سلام پیش کرتے ہیں۔ہمارے پائلٹوں نے جوان مردی اورشجاعت کی نئی تاریخ رقم کی۔تقریب میں دیگرخواتین رہنماؤں نے کثیر تعداد میں شرکت کی۔ڈاکٹر روبینہ اخترنے تقریب میں شریک خواتین کے ساتھ مل کر پاک فوج کے حق میں نعرے لگائے اور پاکستان کی مزید کامیابیوں کے لیے دعا کی۔