Live Updates

پاکستان ، یو اے ای کے کمرشل بینکوں سے 35 کروڑ ڈالر تک کے قرضے کے حصول کیلئے کوشاں

منگل 20 مئی 2025 18:26

لاہور(اُردو پوائنٹ اخبارتازہ ترین - این این آئی۔ 20 مئی2025ء)پاکستان متحدہ عرب امارات کے کمرشل بینکوں سے مالیاتی ضروریات پوری کرنے کے لیے 35 کروڑ ڈالر تک کے قرضے حاصل کرنے کی کوشش کر رہا ہے۔میڈیا رپورٹ کے مطابق پیشرفت سے آگاہ بینکنگ ذرائع کے مطابق وزیر خزانہ محمد اورنگزیب ان بینکوں سے پاکستان کے قرضے دوبارہ شروع کرنے کے لیے بات چیت کر رہے ہیں اور قرضے کی حتمی منظوری بہت جلد متوقع ہے۔

موجودہ مالی سال کی پہلی 3 سہ ماہیوں میں حکومت کو غیر ملکی قرض دہندگان (جن میں زیادہ تر اماراتی بینک شامل ہیں)سے تقریباً 50 کروڑ 40 لاکھ ڈالر موصول ہوئے جو پچھلے سال پاکستان کی مالی اعانت سے دور رہنے والے تجارتی بینکوں کی جانب سے معمولی بحالی کی نشاندہی کرتا ہے۔حکومت نے اس مالی سال کے لیے غیر ملکی بینکوں سے 3.8 ارب ڈالر کی مالی اعانت کا ہدف مقرر کیا ہے تاہم پہلے 9 ماہ میں اصل وصولی سست رہی ہے۔

(جاری ہے)

حکومت نے مالی سال 2025 کے لیے ایک ارب ڈالر کے بین الاقوامی بانڈز کے اجرا ء کا بھی ہدف رکھا ہے اس کے علاوہ، دو طرفہ شراکت داروں (چین اور سعودی عرب)سے 9 ارب ڈالر کی آمد کا تخمینہ لگایا گیا ہے، ان تخمینوں میں سعودی عرب سے 5 ارب ڈالر کا ٹائم ڈیپازٹ اور چین سے 4 ارب ڈالر کا سیف ڈیپازٹ شامل ہے، یہ تخمینے پاکستان کے لیے بیرونی مالیاتی خسارہ پورا کرنے میں اہم ہیں جو کہ آئی ایم ایف پروگرام کا حصہ ہیں۔

پاکستان کی جانب سے ترقیاتی اور مالیاتی اہداف کے لیے تعاون کے سلسلے میں متحدہ عرب امارات کے 3 بینکوں شارجہ اسلامک بینک، ابوظہبی اسلامک بینک اور عجمان بینک کے ساتھ ورچوئل ملاقاتیں کی ہیں، ان مذاکرات کی قیادت وزیر خزانہ محمد اورنگزیب نے کی اور انہوں نے اسٹینڈرڈ چارٹرڈ بینک کی ٹیم سے بھی بات چیت کی۔، 35 کروڑ ڈالر کے قرضوں کی ضمانت ایشیائی ترقیاتی بینک فراہم کرے گا۔