Live Updates

مصر کے صدر فیلڈ مارشل عبدالفتاح السیسی نے دورہ پاکستان کی حامی بھر لی

وزیر اعظم اور مصر کے صدر کا ٹیلیفونک رابطہ، شہباز شریف کی جانب سے فیلڈ مارشل عبدالفتاح السیسی کو دورہ پاکستان کی دعوت دی گئی

محمد علی منگل 20 مئی 2025 22:58

اسلام آباد (اُردو پوائنٹ اخبارتازہ ترین۔ 20 مئی2025ء) مصر کے صدر فیلڈ مارشل عبدالفتاح السیسی نے دورہ پاکستان کی حامی بھر لی، وزیر اعظم اور مصر کے صدر کا ٹیلیفونک رابطہ ہوا، شہباز شریف کی جانب سے فیلڈ مارشل عبدالفتاح السیسی کو دورہ پاکستان کی دعوت دی گئی۔ تفصیلات کے مطابق وزیر اعظم ہاوس سے جاری اعلامیہ کے مطابق منگل کے روز وزیراعظم شہباز شریف نے مصر کے صدر فیلڈ مارشل عبدالفتاح السیسی سے ٹیلیفونک گفتگو کی۔

اس دوران وزیراعظم نے جنوبی ایشیا کے حالیہ بحران میں فعال سفارتکاری پر صدر السیسی سے اظہار تشکر کیا۔ وزیراعظم نے ملکی خودمختاری اور علاقائی سالمیت کے دفاع پر پاکستان کی بہادر مسلح افواج کو خراج تحسین کیا اور کہا کہ پاکستان علاقائی امن کے مفاد میں بھارت سے جنگ بندی مفاہمت برقرار رکھنے کیلیے پرعزم ہے۔

(جاری ہے)

وزیر اعظم شہباز شریف نے مصری صدر کی توجہ سندھ طاس معاہدے کی اہمیت کی طرف بھی مبذول کرائی۔

وزیر اعظم ہاوس کے اعلامیہ کے مطابق دونوں رہنماؤں نے مشرق وسطی بالخصوص غزہ کی تشویشناک صورتحال پر تبادلہ خیال کیا۔ وزیراعظم نے کہاکہ عالمی برادری غزہ میں درکار انسانی امداد کی مسلسل اور بروقت فراہمی یقینی بنائے، امید ہے آئندہ ماہ 2 ریاستی حل پر قوام متحدہ کی کانفرنس کے بامعنی نتائج ہوں گے۔وزیراعظم نے پاک مصر تجارت اور سرمایہ کاری کے فروغ کی ضرورت کو بھی اجاگر کیا۔

جبکہ مصری صدر نے پاکستان اور بھارت کے درمیان جنگ بندی مفاہمت کا خیر مقدم کیا اور جنوبی ایشیا میں پائیدار امن اور استحکام کے لیے پاکستان کی کوششوں کو سراہا۔ ٹیلی فونک گفتگو کے دوران وزیراعظم شہباز شریف کی جانب سے مصری صدر کو دورہ پاکستان کی دعوت دی گئی، جسے فیلڈ مارشل عبدالفتاح السیسی نے قبول کر لیا۔