Live Updates

وفاقی وزیر ریلوے محمد حنیف عباسی سے سپیکر پنجاب اسمبلی ملک محمد احمد خان کی ملاقات، ملک کی موجودہ سیاسی صورتحال، پنجاب حکومت اور وزارت ریلوے کے درمیان جاری تعاون پر تفصیلی تبادلہ خیال

جمعرات 22 مئی 2025 22:30

اسلام آباد (اُردو پوائنٹ اخبارتازہ ترین - اے پی پی۔ 22 مئی2025ء) وفاقی وزیر ریلوے محمد حنیف عباسی سے پنجاب اسمبلی کے سپیکر ملک محمد احمد خان نے جمعرات کو وزارت ریلوے میں ملاقات کی۔ ملاقات میں دونوں رہنمائوں نے ملک کی موجودہ سیاسی صورتحال، پنجاب حکومت اور وزارت ریلوے کے درمیان جاری تعاون پر تفصیلی تبادلہ خیال کیا۔ملاقات میں ملک محمد احمد خان نے صوبہ پنجاب میں ترقیاتی منصوبوں اور ریلوے کے شعبے میں بہتری کے حوالے سے حکومتی اقدامات کو سراہا اور وزارت ریلوے کے ساتھ تعاون کو پنجاب کی ترقی میں کلیدی کردار قرار دیا۔

دونوں رہنمائوں نے اس بات پر اتفاق کیا کہ ریلوے انفراسٹرکچر کی بہتری سے نہ صرف ٹرانسپورٹ کے نظام میں اصلاحات ممکن ہوں گی بلکہ ملک کی مجموعی اقتصادی ترقی کو بھی فروغ ملے گا۔

(جاری ہے)

انہوں نے پنجاب حکومت اور وزارت ریلوے کے مابین موجودہ تعاون کو مزید مستحکم بنانے پر زور دیا تاکہ عوام کو بہتر سہولیات فراہم کی جا سکیں۔ اس موقع پر ملک محمد احمد خان نے کہا کہ پنجاب حکومت ریلوے کے شعبے میں جاری اصلاحات کی بھرپور حمایت کرتی ہے اور مشترکہ منصوبوں کے ذریعے عوامی فلاح و بہبود کو ترجیح دی جائے گی۔

وفاقی وزیر ریلوے محمد حنیف عباسی نے کہا کہ وزارت ریلوے پنجاب کے ساتھ مضبوط تعاون کے ذریعے ترقیاتی منصوبے جلد از جلد مکمل کرنے کے لیے پرعزم ہے۔ انہوں نے یقین دلایا کہ ریلوے کے نظام کو جدید بنانے اور سہولیات کو بہتر بنانے کے لیے ہر ممکن کوشش کی جائے گی۔ملاقات میں ملک کی سیاسی صورتحال پر بھی تفصیل سے بات چیت ہوئی اور دونوں رہنمائوں نے ملک میں استحکام اور ترقی کے لیے حکومتی اداروں کے درمیان تعاون کی اہمیت پر زور دیا۔ دونوں رہنمائوں نے پاکستان کے مستقبل کو روشن بنانے کے لیے مشترکہ کاوشوں کو جاری رکھنے کا عزم کیا۔

آپریشن بنیان مرصوص سے متعلق تازہ ترین معلومات

Facebook Twitter Google + Share on Whatsapp

متعلقہ عنوان :

مزید قومی خبریں