Live Updates

لاہور قلندرز نے کراچی کنگز کو شکست دیکر پی ایس ایل سے باہر کردیا

جمعہ 23 مئی 2025 01:20

لاہور (اُردو پوائنٹ اخبارتازہ ترین - اے پی پی۔ 23 مئی2025ء) پاکستان سپر لیگ (پی ایس ایل) کے دسویں ایڈیشن کے پہلے الیمینیٹر میں لاہور قلندرز نے کراچی کنگز کو 6 وکٹوں سے شکست دے کر ٹورنامنٹ سے باہر کردیا۔قذافی سٹیڈیم میں کھیلے گئے میچ میں کراچی کنگز نے پہلے بیٹنگ کرتے ہوئے مقررہ 20اوورز میں 8وکٹوں کے نقصان پر 190رنز بنائے۔لاہور قلندرز نے فخرزمان اور عبداللہ شفیق کی جارحانہ اننگز کی بدولت مطلوبہ ہدف 18.4اوورز میں 4وکٹوں کے نقصان پر حاصل کرلیا۔

کراچی کنگز نے لاہور قلندرز کے خلاف ٹاس جیت کر پہلے بیٹنگ کرنے کا فیصلہ کیا، کراچی کی جانب سے کپتان ڈیوڈ وارنر کے علاوہ کوئی بھی کھلاڑی زیادہ دیر تک وکٹ پر نہیں ٹھہرسکا۔ٹم سیفرٹ 16، جیمز ونس 4، سعد بیگ 11، عرفان خان نیازی 18، محمد نبی 16، عباس آفریدی 2اور حسن علی کھاتہ کھولے بغیر آوٹ ہوئے۔

(جاری ہے)

کپتان ڈیوڈ وارنر نے 52گیندوں پر 75رنز کی اننگز کھیلی جس میں 3چھکے اور 8چوکے شامل تھے جبکہ خوشدل شاہ 27رنز پر ناٹ آوٹ رہے۔

لاہور قلندرز کی جانب سے حارث روف نے 3، شاہین شاہ آفریدی نے 2جب کہ زمان خان، شکیب الحسن اور محمد نعیم نے ایک ایک وکٹ حاصل کی۔لاہور قلندرز کی جانب سے فخرزمان اور محمد نعیم نے ٹیم کو جارحانہ آغاز فراہم کیا تاہم نعیم 14رنز بنانے کے بعد آوٹ ہوگئے۔فخرزمان نے 3چھکوں اور 5چوکوں کی مدد سے 28گیندوں پر 47رنز کی اننگز کھیلی جب کہ عبداللہ شفیق نے 35گیندوں پر 65رنز بنائے، ان کی اننگز میں 5چھکے اور 3چوکے شامل تھے۔

کوشال پریرا نے بھی 24گیندوں پر 30رنز بناکر جیت میں اہم کردار ادا کیا، راجا پکسے نے 12گیندوں پر 23رنز کی ناقابل شکست اننگز کھیلی۔کراچی کنگز کی جانب سے حسن علی نے 2، میر حمزہ اور فواد علی نے ایک ایک وکٹ حاصل کی۔واضح رہے کہ پہلے کوالیفائر میں کوئٹہ گلیڈی ایٹرز نے دفاعی چمپئن اسلام آباد یونائیٹڈ کو شکست دے کر فائنل میں رسائی حاصل کی تھی،پاکستان سپر لیگ کے دوسرے کوالیفائر میں کل لاہور قلندرز اور اسلام آباد یونائیٹڈ مدمقابل ہوں گے، جیتنے والی ٹیم فائنل میں کوئٹہ گلیڈی ایٹرز سے ٹکرائے گی۔