پاکستان سمیت دنیا بھر میں کچھوؤں کا عالمی دن 23 مئی کو منایا گیا

جمعہ 23 مئی 2025 11:23

اسلام آباد (اُردو پوائنٹ اخبارتازہ ترین - اے پی پی۔ 23 مئی2025ء) پاکستان سمیت دنیا بھر میں کچھوؤں کا عالمی دن جمعہ 23 مئی کو منایا گیا ۔ اس دن کے منانے کا بنیادی مقصد دنیا بھر میں کچھوؤں کی اہمیت اور ان کے تحفظ کے حوالے سے شعور اجاگر کرنا ہے۔ ورلڈ ٹرٹل ڈے کو منانے کا آغاز 2000 میں ہوا تھا۔واضح رہے کہ کچھوا، زمین پر پائے جانے والے سب سے قدیم ترین رینگنے والے جانداروں میں سے ایک ہے۔

ماہرین کے مطابق یہ لگ بھگ 21 کروڑ سال قبل وجود میں آیا تھا۔ اس کی اوسط عمر بہت طویل ہوتی ہے اور عام طور پر ایک کچھوے کی عمر 30 تا 50 برس تک ہوسکتی ہے جبکہ بعض کچھوے سو سال کی عمر بھی پاتے ہیں ۔سمندری کچھوؤں میں سب سے طویل العمری کا ریکارڈ 152 سال ہے۔انٹارکٹکا کے علاوہ کچھوا دنیا کے تمام براعظموں میں پایا جاتا ہے۔

(جاری ہے)

کچھوے انتہائی سرد موسم میں زندہ نہیں رہ سکتے ہیں یہی وجہ ہے کہ یہ برفیلے علاقوں میں نہیں پائے جاتے ۔

بدقسمتی سے اس وقت کچھوؤں کی زیادہ تر اقسام معدومی کے خطرے سے دو چار ہیں ۔عالمی ادارہ برائے تحفظ فطرت (آئی یو سی این)کے مطابق دنیا بھر میں کچھوؤں کی 300میں سے 129 اقسام اپنی بقا کیلئے جدوجہد کر رہی ہیں اور یہ اقسام معمولی یا شدید قسم کے خطرات سے دو چار ہیں ۔کچھوؤں کی ممکنہ معدومی اور ان کی آبادی میں کمی کی وجوہات میں بے دریغ شکار، غیر قانونی تجارت اورکچھوئوں کی پناہ گاہوں میں کمی وغیرہ شامل ہیں ۔اس دن کی مناسبت سے سرکاری و غیر سرکاری اداروں کے زیر اہتمام مختلف تقریبات میں کچھوؤں کی معدومی کے حوالہ سے آگاہی فراہم کی گئی ۔