یونیورسٹی آف سرگودھا میں ''جغرافیائی سیاسی زاویہ سے تنازعات کا تجزیہ اور ان کا حل'' کے موضوع پر سیمینار

جمعہ 23 مئی 2025 18:48

سرگودھا (اُردو پوائنٹ اخبارتازہ ترین - اے پی پی۔ 23 مئی2025ء) یونیورسٹی آف سرگودھا میں شعبہ سیاسیات و بین الاقوامی تعلقات کے زیر اہتمام ''جغرافیائی سیاسی زاویہ سے تنازعات کا تجزیہ اور ان کا حل'' کے موضوع پر سیمینار کا انعقاد کیا گیا۔ جس میں نیشنل ڈائیلاگ فورم اسلام آباد کے ایگزیکٹو ڈائریکٹر شہریار خان نے بطور مہمانِ خصوصی شرکت کی جبکہ چیئرمین شعبہ سیاسیات و بین الاقوامی تعلقات، پروفیسر ڈاکٹر اشفاق احمد، اسسٹنٹ پروفیسر ڈاکٹر عدیل عرفان راؤ، دیگر فیکلٹی ممبران اور طلبہ نے کثیر تعداد میں شرکت کی۔

سیمینار سے خطاب کرتے ہوئے شہریار خان نے کہا کہ جنوبی ایشیا کو درپیش تنازعات کا پائیدار حل صرف بات چیت اور سیاسی شمولیت میں مضمر ہے۔انہوں نے مسئلہ بلوچستان اور پاک بھارت تعلقات کا حوالہ دیتے ہوئے کہا کہ جب تک شفاف رابطے اور جامع مکالمے کو فروغ نہیں دیا جاتا، انتہاپسندی کے رجحانات پر قابو پانا ممکن نہیں ہوگا۔

(جاری ہے)

انہوں نے کہا کہ جغرافیائی سیاسی کشیدگیاں اکثر تاریخی تلخیوں اور غلط فہمیوں کا نتیجہ ہوتی ہیں، ہمیں نوجوانوں کو امن کی قیادت کے لیے تیار کرنا ہوگا۔

پروفیسر ڈاکٹر اشفاق احمد نے اس بات پر زور دیا کہ یونیورسٹیاں صرف تعلیم کا نہیں بلکہ فکری و علمی مکالمے کا مرکز ہونی چاہئیں۔ انہوں نے کہا کہ موجودہ دور میں عالمی تنازعات کو صرف طاقت یا دباؤ کے ذریعے ہی نہیں حل کیا جا سکتا، بلکہ ان کے انسانی اور ترقیاتی پہلوؤں کو بھی پیش نظر رکھنا ضروری ہے۔ڈاکٹر عدیل عرفان راؤ نے دنیا میں جاری تنازعات پر ایک علمی تجزیہ پیش کیا اور مشرقِ وسطیٰ، مشرقی یورپ اور جنوبی ایشیا میں کشیدہ حالات کا پس منظر واضح کیا۔

انہوں نے کہا کہ اصل ضرورت سفارت کاری، بین الاقوامی تعاون اور علاقائی ہم آہنگی کی ہے۔سیمینار کے اختتام پر سوال و جواب کا ایک معلوماتی سیشن بھی منعقد ہوا، جس میں طلبہ و طالبات نے بڑی طاقتوں کے کردار، مقامی سطح پر امن کی کوششوں، اور تعلیمی اداروں کے کردار پر سوالات اٹھائے اور مقامی تناظر میں امن کے خودمختار ماڈلز اپنانے کی ضرورت پر زور دیا۔