پہلگام واقعے کے تناظر میں بھارت کی طرف سے ایف اے ٹی ایف کواپنے سیاسی فائدے کے لئے استعمال کرنے کی کوشش

اسلام آباد (اُردو پوائنٹ اخبارتازہ ترین - اے پی پی۔ 24 مئی2025ء) بھارت کی طرف سے فنانشل ایکشن ٹاسک فورس (ایف اے ٹی ایف)کے فیصلوں پر اثر انداز ہونے اور پاکستان کوواپس گرے لسٹ میں دھکیلنے کے لئے عالمی ادارے پر حالیہ دبائو اپنے پاکستان دشمن ہندوتوا ایجنڈے کو آگے بڑھانے کے لیے عالمی اداروں کی سیاست زدہ کرنے کی اس کی ایک اور کوشش ہے۔کشمیر میڈیا سروس کے مطابق پہلگام واقعے کے تناظر میں بھارت کی طرف سے ایف اے ٹی ایف کواپنے سیاسی فائدے کے لئے استعمال کرنے کی کوشش اس کی بوکھلاہٹ کو ظاہر کرتی ہے۔

اپنے حقیر سیاسی مفادات کی تکمیل کے لیے ایسے عالمی پلیٹ فارمز کو سیاست زدہ کرنانہ صرف غیر اخلاقی ہے بلکہ اس سے ایک خطرناک مثال قائم ہورہی ہے جس کی عالمی برادری کو شدیدمذمت کرنی چاہیے۔

(جاری ہے)

بھارت طویل عرصے سے اپنے سیاسی مقاصد کے لئے عالمی فورمز کو پاکستان کے خلاف استعمال کر رہا ہے اور ایف اے ٹی ایف پر دبائو ڈالنے کی کوشش بھی اسی سلسلے کی ایک کڑی ہے۔

یہ ایک شرمناک عمل ہے لیکن حیرت انگیز نہیں کیونکہ اپنے سیاسی مقاصد کے حصول کے لئے عالمی اداروں کو کمزور کرنے کی بھارت کی ایک طویل تاریخ ہے۔ پاکستان کو گرے لسٹ میں دوبارہ شامل کرنے کے لیے ایف اے ٹی ایف پر دبائو ڈالنے کی بھارت کی تازہ ترین کوشش سے ظاہر ہوتا ہے کہ بھارت عالمی اداروں کو بدنام اورکمزورکرنے کے لیے کس حد تک جاسکتاہے۔ تاہم ایسی کوششیں بالآخر ناکام ہوں گی۔

مودی کو یاد رکھنا چاہیے کہ ایف اے ٹی ایف سیاسی پروپیگنڈے کا اسٹیج نہیں بلکہ ایک تکنیکی ادارہ ہے۔ بھارت کے مسلسل پروپیگنڈے کے باوجود پاکستان نے 2018سے ایف اے ٹی ایف سے متعلقہ معاملات پر مسلسل شفاف پیش رفت کی ہے اور عالمی برادری نے بھی اس حقیقت کو تسلیم کیا ہے۔ پاکستان انسداد منی لانڈرنگ اور دہشت گردی کی مالی معاونت سے نمٹنے کے اپنے عزم پر قائم ہے اور بھارت کے بدنام کرنے سے اس میں کوئی تبدیلی نہیں آئے گی۔

ایف اے ٹی ایف جیسے عالمی پلیٹ فارم کے ذریعے پاکستان کو کمزور کرنے کی بھارت کی کوشش سفارتی نقطہ نظرکے بجائے اس کی بوکھلاہٹ کو ظاہر کرتی ہے۔یہ بہت ضروری ہے کہ عالمی برادری بھارت کی طرف سے تقسیم اور تباہ کن مقاصد کے لیے بین الاقوامی پلیٹ فارمز کے مسلسل غلط استعمال کا نوٹس لے۔ عالمی برادری کو بھارت کو ایک واضح اور غیر مبہم پیغام دیناچاہیے کہ وہ اپنے حقیر سیاسی فائدے کے لیے عالمی اداروں کے مقاصد کو مسخ کرنے کی کوششیں بند کرے۔

فیصلے حقائق کی بنیاد پر کیے جانے چاہئیں نہ کہ سیاسی بنیادوں پرلگائے گئے من گھڑت الزامات پر۔ دنیا کو بھارت کے مذموم ہتھکنڈوں کو مسترد کرنا چاہیے اوراس بات کو یقینی بنانا چاہیے کہ ایف اے ٹی ایف جیسے عالمی فورم غیر جانبدار رہیں اور عالمی مالیاتی نظام کو برقرار رکھنے کے اپنے بنیادی مقاصد پر توجہ مرکوز رکھیں۔پاکستان کودوبارہ گرے لسٹ میں ڈالنے کے لیے ایف اے ٹی ایف پر دبائو ڈالنے کی بھارت کی تازہ ترین کوشش سے یہ بات کھل کر سامنے آئی ہے کہ بھارت کس طرح عالمی امور میں منفی کردار ادا کررہا ہے۔