راولپنڈی کینٹ و شہر میں پانی بحران کے خاتمہ کیلئے بڑے منصوبوں پر کام شروع کردیا ہے ،ملک ابرار احمد

اتوار 25 مئی 2025 18:40

راولپنڈی (اُردو پوائنٹ اخبارتازہ ترین - اے پی پی۔ 25 مئی2025ء) پاکستان مسلم لیگ ن کے رکن قومی اسمبلی ملک ابرار احمد نے کہا ہے کہ راولپنڈی کینٹ وشہر میں پانی بحران کا مکمل خاتمہ کرنے کے لئے بڑے منصوبوں پر کام شروع کردیا گیا ہے،نئے ڈیموں کی تعمیر سے پانی کی کمی دور ہونے کے ساتھ ساتھ ٹینکر مافیا کا بھی خاتمہ ہوگا۔اتوار کو اے پی پی سے گفتگو کرتے ہوئے ملک ابرار احمد نے کہا کہ پانی بحران جیسے چینلجز سے نمٹنے کے لئے جہاں ددوچھہ و چہان ڈیم کی تعمیر جیسے منصوبوں پر کام جاری ہے وہیں راول ڈیم اور خان پور ڈیم میں پانی کی استعداد کار کو بڑھانے کے لئےبھی کام کیا جا رہا ہے۔

انہوں نے بتایا کہ بارشوں کے پانی کو محفوظ بنانے کے ساتھ زیر زمین پانی کو ذخیرہ کرنے کے لئے بھی جدید طرز کے زیر زمین ٹینکوں کی تعمیر کا منصوبہ بھی آخری مراحل میں ہے اور موسم گرما میں راولپنڈی کی عوام کو صاف پانی جیسی بنیادی سہولت باآسانی دستیاب ہوگی ۔

(جاری ہے)

انہوں نے کہا کہ ہر سال موسم گرما شروع ہوتے ہی راولپنڈی اور چکلالہ کنٹونمنٹس کے مکینوں کو پانی ذخیرہ کرنے کی سہولتیں نہ ہونے کی وجہ سے شدید قلت کا سامنا کرنا پڑتا ہے۔

انہوں نے مزید کہا کہ گرم موسم میں عوام کو پانی کی وافر فراہمی کو یقینی بنانے کے لیے اہم منصوبوں کی بروقت تکمیل کے لیے مختص فنڈز کے اجرا کو ترجیح دی جا رہی ہے۔ انہوں نے کہا کہ بھاٹا چوک میں زیر زمین ٹینکوں کی تعمیر، جس میں 200,000 گیلن یومیہ ذخیرہ کرنے کی گنجائش ہے اور گوالمنڈی جس میں 100,000 گیلن یومیہ کی گنجائش ہے، تیزی سے آگے بڑھ رہی ہے۔ انہوں نے کہا کہ نصیر آباد، برف خانہ چوک، غازی آباد، افشاں کالونی، ٹینچ بھٹہ، ٹاہلی موہری اور چکلالہ چھاؤنی کے وارڈ 7، 8، 9 اور 10 میں منصوبے جاری ہیں، ہر ایک کو 50,000 گیلن روزانہ ذخیرہ کرنے کے لیے ڈیزائن کیا گیا ہے۔