Live Updates

پی ٹی آئی احتجاجی تحریک ، مختلف وقت میں مختلف افراد اس کو لیڈ کریں گے،جنید اکبر

پیر 26 مئی 2025 19:26

اسلام آباد(اُردو پوائنٹ اخبارتازہ ترین - آن لائن۔ 26 مئی2025ء)پاکستان تحریکِ انصاف نے احتجاجی تحریک کی قیادت کے لیے ایک بار پھر وزیرِ اعلیٰ خیبر پختونخوا علی امین گنڈاپور پر اعتماد کا اظہار کیا ہے۔صوبائی صدر اور چیئرمین پبلک اکاؤنٹس کمیٹی جنید اکبر نے کہا ہے کہ پارٹی نے فیصلہ کیا ہے، نئی احتجاجی تحریک کی قیات علی امین گنڈاپور کریں گے لیکن مختلف وقتوں میں مختلف افراد اس کو لیڈ کریں گے، کسی ایک بندے پر بوجھ نہیں ڈالا جائے گا۔

ایک انٹرویو میں جنید اکبر نے بتایا کہ احتجاج سے پہلے صوابی یا پھر مارگلہ کے پہاڑوں میں ٹینٹ ویلیج بنا کر جمع ہوں گے، وہاں سے اسلام آباد کی جانب بڑھیں گے، جس دن اسلام آباد میں احتجاج یا دھرنا ہوگا اسی دن ان شہروں میں بھی دھرنا دیا جائے گا۔

(جاری ہے)

انہوں نے کہا کہ خیبر پختون خوا یا اسلام آباد کے قریبی علاقوں کے لوگ مارگلہ ٹینٹ ولیج میں قیام کریں گے، اکثریت کی رائے ہے کہ کراچی، کوئٹہ یا پنجاب کے لوگ اسلام آباد نہ آئیں۔

جنید اکبر کا کہنا تھا کہ اگر ہم اسلام آباد میں دھرنا دیتے ہیں تو ملک بھر کے شہروں میں دھرنا دیا جائے گا، صوابی شاہراہ پر دھرنا دیا جائے گا جبکہ مارگلہ سے اسلام آباد کی طرف بڑھیں گے۔جنید اکبر نے یہ بھی کہا ہے کہ ماضی کی خامیوں کو دور کرتے ہوئے اکثریت کی رائے سے فیصلہ ہوگا، کسی ایک بندے پر بوجھ نہیں ڈالا جائے گا۔