Live Updates

شہید بینظیر بھٹو یونیورسٹی میں فنانس اینڈ پلاننگ کمیٹی کا17واں اجلاس ،متعدد ترقیاتی منصوبوں کی منظوری دی گئی

منگل 27 مئی 2025 16:57

حیدرآباد (اُردو پوائنٹ اخبارتازہ ترین - اے پی پی۔ 27 مئی2025ء) شہید بینظیر بھٹو یونیورسٹی، شہید بینظیر آباد میں فنانس اینڈ پلاننگ کمیٹی کا 17 واں اجلاس وائس چانسلر پروفیسر ڈاکٹر مدد علی شاہ کی زیر صدارت منعقد ہوا۔ اجلاس میں ہائر ایجوکیشن کمیشن اسلام آباد کی نمائندہ ثمینہ درانی، وزیر اعلیٰ سندھ کے نمائندہ سید زین العابدین شاہ، ڈائریکٹر فنانس اشفاق احمد شیخ، سنڈیکیٹ کے اراکین پروفیسر ڈاکٹر لیاقت علی زرداری، پروفیسر ڈاکٹر سلمان بشیر، پروفیسر ڈاکٹر محمد افضل کمبوہ، منظور علی سیال اور دیگر متعلقہ افسران نے شرکت کی۔

اجلاس کے دوران مالی سال26۔2025کے بجٹ، موجودہ مالی صورتحال، جاری ترقیاتی منصوبوں اور آئندہ مالی ضروریات پر مشاورت کی گئی۔ اجلاس میں آمدنی میں اضافے، اخراجات میں کمی اور مالی استحکام سے متعلق مختلف تجاویز پر بھی غور کیا گیا جبکہ متعدد ترقیاتی منصوبوں کی منظوری دی گئی۔

(جاری ہے)

اجلاس میں کمیٹی نے اپنے 16 ویں اجلاس کے منٹس کی منظوری دی اور مجوزہ بجٹ کو سفارشات کی روشنی میں منظور کیا۔

اس موقع پر وائس چانسلر ڈاکٹر مدد علی شاہ نے کہا کہ یونیورسٹی کی ترقی اور تعلیمی معیار کی بہتری کے لیے مالی وسائل کا شفاف اور دانشمندانہ استعمال ناگزیر ہے۔ اُنہوں نے کہا کہ یونیورسٹی کو ایک اعلیٰ علمی و تحقیقی ادارے میں تبدیل کرنا ہمارا وژن ہے اور ایسے اجلاس اس مقصد کے حصول کے لیے اہم کردار ادا کرتے ہیں۔