Live Updates

قومیں قربانی اور اتحاد سے ناقابل تسخیر بنتی ہیں،مقررین

یوم تکبیر کی مناسبت سے پرچم کشائی کی پروقار تقریب اور ریلی کا انعقاد

بدھ 28 مئی 2025 15:16

راجووال (اُردو پوائنٹ اخبارتازہ ترین - این این آئی۔ 28 مئی2025ء)28مئی یومِ تکبیر کے موقع پر ایک پر وقار تقریب اور حب الوطنی سے بھرپور ریلی کا انعقاد کیا گیا۔ تقریب کا آغاز پرچم کشائی سے ہوا، جس کی سعادت ممبر قومی اسمبلی چوہدری ریاض الحق جج اور ایڈیشنل ڈپٹی کمشنر ریونیو محمد ابراہیم ارباب نے حاصل کی۔تقریب میں ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، اسسٹنٹ کمشنر رب نواز، سی ای او ایجوکیشن محمد یوسف کاہلوں، صدر بار محمد اصغر خان، انجمن تاجران کے نمائندے، مختلف محکموں کے افسران، سول سوسائٹی اور شہریوں کی کثیر تعداد نے شرکت کی۔

تقریب میں قومی ترانہ بجایا گیا جبکہ پولیس کے چاک و چوبند دستے نے قومی پرچم کو سلامی پیش کی۔ بعد ازاں یوم تکبیر کے حوالے سے پاک افواج، ایٹمی سائنسدانوں اور ملک کو ناقابل تسخیر بنانے والی قیادت سے اظہار یکجہتی کے لیے ایک ریلی نکالی گئی۔

(جاری ہے)

شرکا نے "پاک فوج زندہ باد"اور "پاکستان پائندہ باد"کے فلک شگاف نعرے لگائے۔ممبر قومی اسمبلی چوہدری ریاض الحق جج نے اس موقع پر خطاب کرتے ہوئے کہا کہ پاکستان ایک آزاد اور خودمختار ملک ہے اور وطن عزیز سے ہی ہماری کامیابیاں اور خوشیاں جڑی ہوئی ہیں۔

انہوں نے کہا کہ 28مئی 1998کو پاکستان اسلامی دنیا کی پہلی ایٹمی طاقت کے طور پر دنیا کے نقشے پر ابھرا، اور اس تاریخی دن کو ممکن بنانے میں سابق وزیراعظم میاں محمد نواز شریف کا جرات مندانہ کردار ناقابلِ فراموش ہے جنہوں نے عالمی دبا کو خاطر میں نہ لاتے ہوئے ایٹمی دھماکے کیے۔انہوں نے اس عزم کا اظہار کیا کہ ملکی سلامتی کے لیے کسی بھی قسم کی قربانی دینے سے دریغ نہیں کیا جائے گا۔اسسٹنٹ کمشنر رب نواز نے کہا کہ 28مئی خوشی اور افتخار کا دن ہے، جس دن پاکستان ناقابل تسخیر بنا۔ انہوں نے کہا کہ پاکستان کو میلی آنکھ سے دیکھنے والوں کی آنکھیں نکال لی جائیں گی اور ہم سب کو ملکی ترقی و خوشحالی کے لیے متحد ہو کر آگے بڑھنا ہوگا۔