Live Updates

مریم نواز کے صاحبزادے جنید صفدر کا رشتہ ایک بار پھرطے ہوگیا

کیپٹن (ر) صفدر کے بیٹے جنید صفدر کا رشتہ سابق وزیر اعظم اور ن لیگ کے صدر نواز شریف کے عزیزعثمان جاوید کی بیٹی سے طے پایا ہے جو کہ جاوید شفیع کے بیٹے ہیں

فیصل علوی جمعرات 29 مئی 2025 12:18

لاہور(اردوپوائنٹ اخبار تازہ ترین۔29 مئی 2025)وزیراعلیٰ پنجاب مریم نواز کے صاحبزادے جنید صفدر کا رشتہ ایک بار پھر طے ہوگیا، کیپٹن(ر)صفدر کے بیٹے جنید صفدر کا رشتہ سابق وزیر اعظم اور ن لیگ کے صدر نواز شریف کے عزیزوں میں طے ہوا ہے،ذرائع کے مطابق جنید صفدر کا رشتہ جہاں طے ہوا ہے وہ فیملی لاہور میں قیام پذیر ہے۔بتایا گیا ہے کہ جنید صفدر کا رشتہ عثمان جاوید کی بیٹی سے طے پایا ہے جو کہ جاوید شفیع کے بیٹے ہیں جو نواز شریف کے فرسٹ کزن ہیں۔

ذرائع کا کہنا ہے کہ نوازشریف، مریم نواز اور جاوید شفیع سمیت اہل خانہ نے گزشتہ دنوں ملاقات کی تھی اس کے بعد دونوں خاندانوں نے باہمی رضا مندی سے یہ رشتہ طے کر دیا تھا ۔شادی کی تاریخ دونوں خاندان آئندہ چند دنوں میں مشاورت سے طے کریں گے۔

(جاری ہے)

یاد رہے کہ اس سے قبل 12اکتوبر2023ء کوبتایا گیا تھا کہ وزیراعلیٰ پنجاب مریم نواز کے صاحبزادے جنید صفدر کی اہلیہ عائشہ سیف کے درمیان طلاق ہوگئی تھی۔

اس بات کی تصدیق خود جنید صفدر نے انسٹاگرام پر ایک سٹوری پوسٹ کرتے ہوئے کی تھی۔ کیپٹن (ر) صفدر کے صاحبزادے جنید صفدر نے اپنی پوسٹ میں لکھا تھاکہ میری طلاق کے حوالے سے چلنے والی خبریں سچ تھیں۔ یہ انتہائی نجی معاملہ ہے اس لئے میری میڈیا سے درخواست ہے کہ ہماری پرائیویسی کا احترام کیا جائے۔مریم نوازکے صاحبزادے جنید صفدر نے مزیدیہ بھی لکھا تھاکہ مجھے امید ہے اس فیصلے سے ہم دونوں کو سکون ملے گا انشاءاللہ اس بارے میں مزید کچھ نہں بولوں گا۔

جنید صفدر نے اس موقع پر اپنی سابقہ اہلیہ عائشہ سیف کیلئے نیک تمناوں کا اظہار کیا تھا۔ قبل ازیں 2021 میں جنید صفدر کی شادی سیف الرحمان کی صاحبزادی عائشہ سیف سے شادی ہوئی تھی۔ جنید صفدر کے نکاح کی تقریب اگست 2021 میں لندن کے لینزبرا ہوٹل میں ہوئی تھی جبکہ شادی کی تقریبات دسمبر میں پاکستان میں ہوئی تھیں۔بعدازاںجنید صفدر کی شادی کی دو الگ الگ تقریبات کی ویڈیوز اور تصاویر سامنے آئیں تھیںجس میں جنید صفدر، دلہن عائشہ سیف، مریم نواز، ان کی صاحبزادیاں اور دیگر رشتے دار دکھائی دئیے تھے۔برطانیہ سے تعلیم مکمل کرنے کے بعدمریم نواز شریف کے صاحبزادے جنید صفدر آج کل لاہور میں مقیم تھے۔