پنجاب میں پولیو کے خاتمے کی کوششیں مثالی ہیں، عظمی کاردار

پنجاب میں پولیو مہم مثالی انداز میں جاری ، ادارے ٹیموں سے تعاون کریں،فوکل پرسن وزیر اعلیٰ پنجاب

جمعرات 29 مئی 2025 15:40

پنجاب میں پولیو کے خاتمے کی کوششیں مثالی ہیں، عظمی کاردار

حجرہ شاہ مقیم (اُردو پوائنٹ اخبارتازہ ترین - این این آئی۔ 29 مئی2025ء)فوکل پرسن وزیراعلی پنجاب برائے پولیو عظمی کاردار نے کہا ہے کہ وزیراعلی پنجاب مریم نواز شریف کی خصوصی ہدایت پر انسداد پولیو مہم کی نگرانی بہترین انداز میں کی جا رہی ہے جس کے باعث پولیو کے خاتمے کے لیے پنجاب میں کیے جانے والے اقدامات دیگر تمام صوبوں سے بہتر ہیں۔ پاکستان کو پولیو سے پاک بنانا ہماری قومی اور اخلاقی ذمہ داری ہے۔

ان خیالات کا اظہار انہوں نے ڈسٹرکٹ کمپلیکس میں انسداد پولیو مہم کے جائزہ اجلاس اور پریس کانفرنس کے دوران کیا۔ اس موقع پر ڈپٹی کمشنر احمد عثمان جاوید، ایڈیشنل ڈپٹی کمشنر ریونیو محمد ابراہیم ارباب، سی ای او ہیلتھ ڈاکٹر سیف اللہ وڑائچ، محکمہ صحت کے افسران اور صحافیوں کی بڑی تعداد موجود تھی۔

(جاری ہے)

اجلاس میں ڈپٹی کمشنر اور ہیلتھ حکام نے پولیو مہم کی کوریج، انڈیکیٹرز اور کیے گئے دیگر انتظامات پر تفصیلی بریفنگ دی۔

فوکل پرسن نے خیمہ بستی میں بچوں کی ویکسینیشن کے عمل کا بھی معائنہ کیا۔عظمی کاردار نے کہا کہ انسداد پولیو مہم کے دوران شدید موسم میں تمام احتیاطی تدابیر کو مدنظر رکھا جائے اور تمام ادارے پولیو ٹیموں سے بھرپور تعاون کریں۔ انہوں نے کہا کہ بہترین کارکردگی دکھانے والے پولیو ورکرز کی حوصلہ افزائی کے لیے تقاریب منعقد کی جائیں گی۔انہوں نے علما کرام، میڈیا اور شہریوں سے اپیل کی کہ وہ پولیو ٹیموں سے بھرپور تعاون کریں تاکہ ملک کو اس مہلک مرض سے نجات دلائی جا سکے۔