Live Updates

عمران خان کا پنجاب میں بنائی گئی 4 رکنی سیاسی کمیٹی پر تحفظات کا اظہار

بانی پی ٹی آئی نے عالیہ حمزہ کو پنجاب میں سیاسی کمیٹی کا سربراہ مقرر کردیا، بانی پی ٹی آئی نے کمیٹی کے حوالے سے اپنی تشویش سینیٹر علی ظفر کے ذریعے پارٹی قیادت تک پہنچا دی، سیاسی کمیٹی کا نوٹیفکیشن دوبارہ جاری کرنے کی ہدایت

فیصل علوی جمعرات 29 مئی 2025 14:36

عمران خان کا پنجاب میں بنائی گئی 4 رکنی سیاسی کمیٹی پر تحفظات کا اظہار

راولپنڈی(اردوپوائنٹ اخبار تازہ ترین۔29 مئی 2025)بانی پی ٹی آئی عمران خان نے پنجاب میں بنائی گئی 4رکنی سیاسی کمیٹی پر اپنے تحفظات کا اظہار کر دیا ہے، بانی پی ٹی آئی نے کمیٹی کے حوالے سے اپنی تشویش سینیٹر علی ظفر کے ذریعے پارٹی قیادت تک پہنچا دی ہے،بانی پی ٹی آئی عمران خان نے سیاسی کمیٹی کا نوٹیفکیشن دوبارہ جاری کرنے کی ہدایت کردی،بانی پی ٹی آئی نے عالیہ حمزہ کو پنجاب میں سیاسی کمیٹی کا سربراہ مقرر کردیا ہے۔

بانی پی ٹی آئی کو پارٹی رہنماوں نے عالیہ حمزہ کے اوپر بنائی جانے والی کمیٹی سے آگاہ کیا جس پر انہوں نے پنجاب میں بنائی جانے والی کمیٹی پر شدید تحفظات کا اظہار کیا۔دوسری جانب پاکستان تحریک انصاف کے مرکزی سیکرٹری اطلاعات نے وضاحت کی ہے کہ عالیہ حمزہ کو پنجاب میں سیاسی کمیٹی کی سربراہی سے نہیں ہٹایا گیا۔

(جاری ہے)

شیخ وقاص اکرم نے کہا ہے کہ عالیہ حمزہ بدستور اپنی ذمہ داری پر موجود ہیں اور چار رکنی کمیٹی ان کی معاونت کیلئے قائم کی گئی ہے۔

خیال رہے کہ اس سے قبل اطلاعات آئیں تھیں کہ پاکستان تحریک انصاف پنجاب کی چیف آرگنائزر عالیہ حمزہ کو عہدے سے ہٹا دیا گیاتھا۔پی ٹی آئی کے چیئرمین بیرسٹر گوہر علی خان نے عالیہ حمزہ کی جگہ پنجاب میں پارٹی کے تنظیمی امور کی نگرانی کیلئے چار رکنی کمیٹی تشکیل دیدی تھی۔میڈیا رپورٹس کے مطابق پی ٹی آئی پنجاب کے اندر بڑھتے ہوئے اندرونی اختلافات کے باعث پنجاب کی قیادت ایک بار پھر تبدیل کی گئی تھی۔

چار رکنی کمیٹی میں پاکستان تحریک انصاف کے سیکرٹری جنرل سلمان اکرم راجہ ،اپوزیشن لیڈرقومی اسمبلی عمر ایوب ،پنجاب اسمبلی میں اپوزیشن لیڈراحمد خان بھچر اور میاں اکرم عثمان کوشامل کیاگیا تھا۔ذرائع کا یہ بھی کہنا تھا کہ تحریک انصاف کے متعدد رہنماوں اور اراکین پنجاب اسمبلی نے بھی پی ٹی آئی لاہور کے صدر شیخ امتیاز کی قیادت پر تحفظات کا اظہار کرتے ہوئے پارٹی کے چیئرمین بیرسٹرگوہر اورسیکرٹری جنرل سلمان اکرم راجہ کو خط لکھ دیاتھا۔

اس سے قبل جنوری 2025ءکو عالیہ حمزہ کو پی ٹی آئی پنجاب کا چیف آرگنائزر مقرر کر دیا گیا تھا۔ بانی پی ٹی آئی عمران خان کی ہدایت پر چیئرمین بیرسٹر گوہر نے عالیہ حمزہ ملک کی تقرری کا نوٹیفکیشن جاری کر دیا تھا۔وزیراعلیٰ خیبرپختونخوا ہ علی امین گنڈاپور سے صدر پی ٹی آئی خیبرپختونخواہ کا عہدہ واپس لے کر ان کی جگہ جنید اکبر کو صدر مقرر کیا گیا تھا۔