اسلام آباد چیمبر آف کامرس اینڈ انڈسٹری میں یوم تکبیر کی تقریب،بزنس کمیونٹی کا قومی دفاع کے لیے غیر متزلزل حمایت کا اعادہ

اسلام آباد (اُردو پوائنٹ اخبارتازہ ترین - اے پی پی۔ 29 مئی2025ء) قومی اتحاد کے ایک طاقتور مظاہرے میں اسلام آباد چیمبر آف کامرس اینڈ انڈسٹری (آئی سی سی آئی) نے پرائم منسٹر یوتھ پروگرام (پی ایم وائی پی) کے تعاون سے یوم تکبیر کی یاد میں ایک باوقار اور پرجوش تقریب کا انعقاد کیا۔ اس تقریب نے 28 مئی 1998ء کو پاکستان کی تاریخی کامیابی کو اجاگر کیا جب قوم ایک ایٹمی طاقت بنی، جس نے جنوبی ایشیا میں سٹریٹجک توازن کو ہمیشہ کے لیے بدل دیا۔

تقریب میں کاروباری رہنمائوں، نوجوانوں کے نمائندوں، سابق فوجیوں، سرکاری افسران اور سول سوسائٹی کے اراکین کی ایک بڑی تعداد نے شرکت کی ۔پی ایم وائی پی کے چیئرمین اور تقریب کے مہمان خصوصی رانا مشہود احمد خان نے یوم تکبیر کو پاکستان کی تاریخ کا ایک اہم لمحہ قرار دیا۔

(جاری ہے)

انہوں نے کہا کہ 28 مئی صرف ایک تاریخ نہیں ہے بلکہ یہ ہمارے قومی عزم، ہماری سائنسی صلاحیت اور ہماری خود انحصاری کا ثبوت ہے۔

انہوں نے نوجوانوں پر زور دیا کہ وہ معاشی اور تکنیکی ترقی کو آگے بڑھانے کے لیے اسی عزم کو آگے بڑھائیں۔ انہوں نے انکشاف کیا آپریشن ’’بنیان مرصوص ‘‘کے بعد 31 ممالک نے بھارت سے خود کو دور کرنے اور پاکستان کے ساتھ تجارتی تعلقات شروع کرنے پر آمادگی ظاہر کی ہے، جو پاکستان کے حق میں جغرافیائی سیاسی تبدیلی کا اشارہ ہے۔ انہوں نے سائبر ڈومین میں پاکستانی نوجوانوں کی غیر معمولی کارکردگی کی تعریف کی جس کے تحت انہوں نے دشمن کے جھوٹے بیانیے کو اجاگر کرنے اور دشمن کی کارروائیوں میں خلل ڈالنے میں اہم کردار ادا کیا۔

انہوں نے خبردار کیا کہ بھارت کی جانب سے سندھ طاس معاہدے کی کسی بھی خلاف ورزی پر پاکستان کی جانب سے سخت اور فیصلہ کن جواب دیا جائے گا۔میجر جنرل (ر) زاہد محمود نے اپنی خودمختاری اور قومی مفادات کے تحفظ کے لیے پاکستان کے غیر متزلزل عزم کا اعادہ کیا۔آئی سی سی آئی کے صدر ناصر منصور قریشی نے اپنے خطبہ استقبالیہ میں حب الوطنی اور یکجہتی کا بھرپور پیغام دیا۔

انہوں نے کہا کہ یوم تکبیر ہماری تاریخ کا ایک سنہری باب ہے، یہ وہ دن ہے جب پاکستان نے دنیا کے سامنے اعلان کیا کہ ہمارا دفاع ناقابل تسخیر ہے۔ انہوں نے کہا کہ پاکستان کا ہر تاجر اور ہر صنعت کار مسلح افواج اور قومی قیادت کے ساتھ کندھے سے کندھا ملا کر کھڑا ہے۔ انہوں نے کہا کہ نجی شعبہ ایک محفوظ اور خوشحال پاکستان کی تعمیر میں اپنا کردار ادا کرتا رہے گا۔

اس موقع پر آئی سی سی آئی کے سابق صدور میاں اکرم فرید اور ظفر بختاوری نے بھی خطاب کیا۔ میاں اکرم فرید نے اقتصادی ترقی اور قومی سلامتی کے درمیان لازم و ملزوم ربط پر زور دیا جبکہ ظفر بختاوری نے ڈاکٹر عبدالقدیر خان اور فیلڈ مارشل سید عاصم منیر سمیت پاکستان کی سائنسی اور عسکری قیادت کو دلی خراج تحسین پیش کیا۔ممتاز اداکار اور فلم ساز شہزاد نواز نے پاکستان کی ایٹمی صلاحیت کو سٹریٹجک ڈیٹرنس اور خود انحصاری کا سنگ بنیاد قرار دیا۔

انہوں نے آپریشن’’ بنیان مرصوص ‘‘کے دوران پاکستان کی مسلح افواج کی پیشہ وارانہ مہارت اور شاندار کارکردگی کی تعریف کی۔تقریب میں ڈیجیٹل وارفیئر کے ابھرتے ہوئے محاذ کو بھی تسلیم کیا گیا اور سوشل میڈیا انفلوانسرز کو ان کی غیر متزلزل کارکردگی پر سرٹیفکیٹس دیئے گئے جنہوں نے غلط معلومات کا مقابلہ کرنے اور دشمن میڈیا آئوٹ لیٹس کی قیادت میں غلط معلومات پھیلانے والی مہموں کو بے نقاب کرنے میں اہم کردار ادا کیا۔

آئی سی سی آئی کے سینئر نائب صدر عبدالرحمان صدیقی نے شکریہ کے کلمات پیش کیے اور تاجر برادری کا پاکستان کے قومی مفادات کے تحفظ اور پرامن، خوشحال اور خود مختار مستقبل کے لیے تمام سٹیک ہولڈرز کے ساتھ قریبی تعاون کے ساتھ کام کرنے کے غیر متزلزل عزم کا اعادہ کیا۔