Live Updates

پاکستانی تاریخ میں قائداعظم کے بعد عمران خان واحد لیڈر ہیں جو اصولوں پر کھڑے ہیں

بانی پی ٹی آئی بالکل واضح ہیں کہ اصولوں سے پیچھے نہیں ہٹنا، تسلیم کرنا ہوگا کہ الیکشن میں ڈاکا ڈالا گیا ہے، یہ نہیں ہوسکتا کہ مٹی ڈال کر آگے بڑھا جائے، سیکرٹری جنرل پی ٹی آئی سلمان اکرم راجا

ثنااللہ ناگرہ ہفتہ 31 مئی 2025 21:50

پاکستانی تاریخ میں قائداعظم کے بعد عمران خان واحد لیڈر ہیں جو اصولوں ..

لاہور ( اردوپوائنٹ اخبار تازہ ترین۔ آئی پی اے ۔ 31 مئی 2025ء ) سیکرٹری جنرل پی ٹی آئی سلمان اکرم راجا نے کہا ہے کہ پاکستانی تاریخ میں قائداعظم کے بعد عمران خان واحد لیڈر ہیں جو اصولوں پر کھڑے ہیں،بانی پی ٹی آئی بالکل واضح ہیں کہ اصولوں سے پیچھے نہیں ہٹنا، تسلیم کرنا ہوگا کہ الیکشن میں ڈاکا ڈالا گیا ہے، یہ نہیں ہوسکتا کہ مٹی ڈال کر آگے بڑھا جائے۔

سیکرٹری جنرل پی ٹی آئی نے جیو نیوز کے پروگرام میں گفتگو کرتے ہوئے کہا کہ احتجاج ایک مسلسل عمل ہے یہ نہیں کہ بٹن دبائیں اور اس دن احتجاج ہو جو فیصلہ کن ہو، میرا نہیں خیال کہ سڑکوں پر نکلنے سے ہمارا کیس کمزور ہوگا، یہ سب چہ مگوئیاں ہیں جو ہوا میں گردش کررہی ہیں، تاریخ کیا رخ لے گی یہ دیکھیں گے، لیکن ہم نے فی الحال انصاف کی بات کرنی ہے، یہ نہیں ہوسکتا کہ ہم رک جائیں گے اور جھوٹ فریب کا ساتھ دیں گے، الیکشن لوٹ لیا تو کوئی بات نہیں، ہم چپ ہوجاتے ہیں، مٹی ڈالو۔

(جاری ہے)

آپ کو چاہئے کہ غلطی کو تسلیم کرو، اس کے بعد آئین قانون اور شفافیت کی جانب بڑھیں، اور شفاف غیرجانبدار الیکشن ہونے دیں، اس پر ضرور بات چیت ہوسکتی ہے۔لیکن یہ نہیں ہوگا کہ الیکشن میں ڈاکا ڈالا گیا ، ظلم کیا ، اور کہا جائے کہ مٹی ڈال دو۔ ایسا نہیں ہوگا۔ انہوں نے کہا کہ عمران خان بالکل واضح ہیں کہ ہم نے اصول سے نہیں ہٹنا، ہم نے وہ مفاہمت نہیں کرنی جو انصاف پر مبنی نہیں ہے۔ جھوٹ کو جھوٹ کہیں گے۔ سیکرٹری جنرل پی ٹی آئی سلمان اکرم راجانے کہا کہ پاکستان کی تاریخ میں قائداعظم کے بعد عمران خان بڑے لیڈر ہیں کیونکہ وہ اصول پر کھڑے ہیں۔ اگر بیانیہ بدلنا ہوتا تو وہ بھی لندن میں بیٹھے ہوتے، عمران خان جانتے ہیں کہ وہ اصول کی بات کیسے کرنی ہے؟