بھارتی فوجیوں نے گزشتہ ماہ مئی میں ایک خاتون سمیت 17کشمیریوں کو شہید کیا

سرینگر (اُردو پوائنٹ اخبارتازہ ترین - اے پی پی۔ 01 جون2025ء) بھارت کےغیرقانونی طورپر زیرتسلط جموں وکشمیرمیں بھارتی فوجیوں نے اپنی یاستی دہشت گردی کی مسلسل کارروائیوں میں گزشتہ ماہ مئی میں ایک خاتون سمیت 17کشمیریوں کو شہید کیا۔کشمیر میڈیا سروس کے شعبہ تحقیق کی طرف سے آج جاری کردہ اعداد و شمار کے مطابق ان میں سے 8کوجعلی مقابلوں میں یادوران حراست شہید کیاگیا۔

بھارتی فوجیوں، پیراملٹری اورپولیس اہلکاروں نے مقبوضہ علاقے میں گزشتہ ماہ محاصرے اور تلاشی کی236کارروائیاں کیں ۔ اس دوران کم از کم 474شہریوں کو گرفتار کیا گیا جبکہ بھارتی فورسز نے پرامن احتجاج کو دبانے کے لیے طاقت کا وحشیانہ استعمال کرتے ہوئے پانچ افرادکو زخمی کیا۔قابض حکام نے کشمیریوں کی 11جائیدادیں بھی ضبط کر لیں۔

(جاری ہے)

بھارت نے ایک اور متنازعہ اقدام کے تحت برطانیہ میں مقیم ماہر تعلیم کشمیری پنڈت خاتون نتاشا کول کا” اوورسیز سٹیزن شپ آف انڈیا “کارڈ منسوخ کر دیا۔

نتاشا کول مقبوضہ علاقے میں انسانی حقوق کی خلاف ورزیوں پر بھارتی حکومت پرتنقید کرتی رہی ہیں۔پاکستان کے ساتھ بڑھتی ہوئی کشیدگی کے دوران بھارتی پیراملٹری بی ایس ایف نے جموں خطے میں ولیج ڈیفنس گارڈز ( وی ڈی جی )کو دوبارہ متحرک کردیاہے۔ وی ڈی جی ایک بدنام زمانہ مسلح جتھہ ہے جو مسلمان شہریوں کو نشانہ بناتا رہا ہے۔ بی ایس ایف نے ان کے لئے تربیتی کیمپ شروع کیے ہیں جن میں ان کو ہتھیاروں کی تربیت اور ٹیکٹیکل آپریشنز کے بارے میں آگاہی دی جارہی ہے۔

وی ڈی جیز 1990کی دہائی میں تشکیل دیاگیاتھا اورانہیں اب جدید رائفلوں سے لیس کیاجارہاہیں جبکہ آرایس ایس سے منسلک خصوصی پولیس افسران ان کی قیادت کررہے ہیں۔ یہ گروپ خاص طور پر جموں خطے کے پونچھ، راجوری اور کٹھوعہ اضلاع میں متحرک ہیں اورقابض حکام انہیں دور دراز علاقوں میں آزادی پسندوں کو دبانے کے لیے استعمال کررہے ہیں۔ بھارت نے”آپریشن شیلڈ“ کے تحت مقبوضہ علاقے میں بڑے پیمانے پر شہری دفاع کی مشقوں کا ڈرامہ رچایا۔

دس اضلاع میں کی گئی مشقوں میں فرضی فضائی حملے،لوگوں کا انخلاءاور بلیک آﺅٹ شامل تھا۔ ان مشقوں کا مقصد پاکستان کے ہاتھوں حالیہ ذلت آمیز شکست کی خفت مٹانا ہے۔پیپلز ڈیموکریٹک پارٹی کی سربراہ محبوبہ مفتی نے ایک بیان میں بھارت پر زور دیا کہ وہ جنگی طرز عمل ختم کرے اور کشمیری نوجوانوں کے خلاف کریک ڈاﺅن بند کرے۔ انہوں نے کالے قانون پبلک سیفٹی ایکٹ کے غلط استعمال پر تنقید کی اور سندھ طاس معاہدے کی معطلی کی حمایت کرنے پر نیشنل کانفرنس کی مذمت کی اور اسے کشمیر کے مفادات سے غداری قرار دیا۔