Live Updates

عالمی برادری مقبوضہ جموں و کشمیر کی بگڑتی ہوئی صورت حال کا نوٹس لے : حریت کانفرنس

پیر 2 جون 2025 17:04

سرینگر (اُردو پوائنٹ اخبارتازہ ترین - اے پی پی۔ 02 جون2025ء) غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے تنازعہ کشمیر کے پرامن حل اور بھارتی حکومت کی طرف سے چھینے گئے بنیادی حقوق کے حصول کے لیے کشمیریوں میں اتحاد اتفاق کی ضرورت پر زوردیا ہے۔کشمیرمیڈیاسروس کے مطابق کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں حریت رہنمائوں کے ایک اجلاس کے بعدجاری ایک بیان میں کہا کہ اجلاس میں مقبوضہ جموں و کشمیر کو درپیش موجودہ سیاسی اور جمہوری چیلنجوں پر تبادلہ خیال کیا گیا۔

اجلاس میں بھارت کے زرخرید گروپوں اور خود ساختہ رہنمائوں کی مذمت کی گئی جنہوں نے مقبوضہ جموں وکشمیرمیں لوگوں کو تقسیم کرنے کے لئے مودی حکومت کے اشاروں پر ناچنا شروع کر دیا ہے۔

(جاری ہے)

اجلاس میں ان عناصر کی مذمت کرتے ہوئے کہاگیا کہ کشمیری عوام نے انہیں مسترد کر دیا ہے۔ اجلاس میں تنازعہ کشمیر کو خالصتا ایک سیاسی مسئلہ قرار دیتے ہوئے کہا گیاکہ پاکستان اور بھارت دونوں نے اقوام متحدہ کی سلامتی کونسل کی قراردادوں پر دستخط کررکھے ہیں جن میں کشمیری عوام کو اپنے سیاسی مستقبل کا فیصلہ آزادانہ اور منصفانہ استصواب رائے کے جمہوری فارمولے کے ذریعے کرنے کی یقین دہانی کرائی گئی ہے۔

اجلاس میں کشمیر کے بارے میں فیلڈ مارشل سید عاصم منیر کے حالیہ بیان کو کشمیری عوام کے لئے حوصلہ افزاء قراردیتے ہوئے سراہاگیا۔اجلاس میں کہاگیا کہ اس بیان نے کشمیریوں کی جدوجہد آزادی میں ایک نئی روح پھونک دی ہے۔اجلاس میں کشمیر پر بات چیت پر زور دیتے ہوئے کہا گیا کہ دیرینہ تنازعہ کشمیر کو عوام کی خواہشات اور امنگوں کے مطابق حل کرنے کے لیے پاکستان، بھارت اور کشمیری قیادت کو میز پر بیٹھنا چاہیے۔

اجلاس میں طویل عرصے سے مختلف جیلوں میں بند حریت رہنمائوں اور نوجوانوں کی مسلسل غیر قانونی نظربندی پر شدید تشویش کا اظہار کرتے ہوئے اقوام متحدہ کے سیکرٹری جنرل انتونیو گوتریس اور عالمی برادری پر زور دیا گیا کہ وہ مقبوضہ جموں و کشمیر کی بگڑتی ہوئی صورت حال کا سنجیدگی سے نوٹس لیں جہاں دس لاکھ سے زائد بھارتی فوجیوں نے کشمیری عوام کو محصور کر کے بنیادی حقوق سے محروم کررکھا ہے جن کی ضمانت اقوام متحدہ کے چارٹر میں دی گئی ہے۔