Live Updates

جو ن لیگ کو سلام کر لے لوگ اسے ووٹ نہیں دیتے

تسلیم کرتا ہوں لوگوں نے ہمیں اور ن لیگ کو بھی ووٹ نہیں دیا، الیکشن کو قطعاً شفاف نہیں مانتے، سمبڑیال ضمنی الیکشن کے نتائج پر ندیم افضل چن کا ردعمل

محمد علی پیر 2 جون 2025 21:00

جو ن لیگ کو سلام کر لے لوگ اسے ووٹ نہیں دیتے

سمبڑیال (اُردو پوائنٹ اخبارتازہ ترین۔ 02 جون2025ء) ندیم افضل چن نے سمبڑیال ضمنی الیکشن سے متعلق تحفظات کا اظہار کرتے ہوئے کہا ہے کہ جو ن لیگ کو سلام کر لے لوگ اسے ووٹ نہیں دیتے، تسلیم کرتا ہوں لوگوں نے ہمیں اور ن لیگ کو بھی ووٹ نہیں دیا، الیکشن کو قطعاً شفاف نہیں مانتے ۔ تفصیلات کے مطابق پاکستان پیپلز پارٹی کے مرکزی سیکرٹری اطلاعات ندیم افضل چن نے پیر کے روز دیگر رہنماوں کے ہمراہ پریس کانفرنس کرتے ہوئے سمبڑیال ضمنی الیکشن سے متعلق کہا کہ میں تسلیم کرتا ہوں لوگوں نے ہمیں مسلم لیگ ن کا ساتھ دینے کی وجہ سے سمبڑیال الیکشن میں ووٹ نہیں دیا، الیکشن کو قطعاً شفاف نہیں مانتے اور الیکشن کمیشن کا کردار بھی اس میں ٹھیک نہیں ہے۔

پنجاب میں پیپلز پارٹی کو کمزور کرنے کے لئے طریقہ اپنایا گیا اور لوگ مان رہے ہیں کہ پنجاب میں پیپلز پارٹی کے ساتھ زیادتی ہوئی ہے۔

(جاری ہے)

میں تسلیم کرتا ہوں لوگوں نے ہمیں ن لیگ کا ساتھ دینے کی وجہ سے ووٹ نہیں دیا، انتخابی مہم میں لوگ کہتے تھے آپ حکومت کے اتحادی ہیں ، ان کے ساتھ چلیں یا خلاف، لوگ کہتے تھے کہ آپ ن لیگ کو چھوڑ دیں ہم آپ کو ووٹ دیں گے۔

ندیم افضل چن نے کہا کہ ن لیگ کا جو ساتھ دیتا ہے عوام ان کو ووٹ نہیں دیتی، میں سمجھتا تھا وزیراعلی کام کررہی ہیں اربوں روپے لگارہی ہیں لیکن یہ تمام دکھانے کے لئے ہے، کسان کی تین فصلیں رل گئی ہیں، پنجاب زراعت پر منحصر کرتا ہے، لوگوں کی مشکلات ہیں ، ہمارے پاس جواب نہیں تھا ہسپتال کیوں پرائیویٹائز ہورہے ہیں، لوگوں نے ہمیں ووٹ نہیں دیا لیکن ن لیگ کو بھی ووٹ نہیں دیا۔

انہوں نے کہا کہ اگر ہماری سرکاری مشینری ہوتی تو ہم بھی 45 ہزار ووٹ بنالیتے،جو کہتے ہیں الیکشن جیت گئے ہیں ان کو جیت مبارک ہو لیکن الیکشن شفاف نہیں ہے یہ پولنگ باکس بھی اٹھا کر لے گئے، اس الیکشن سے اگلے الیکشن کی جہدوجہد کریں گے۔ انہوں نے کہا کہ الیکشن کمیشن عوام کو مشکلات میں کیوں ڈالتا ہے؟ لیٹر جاری کردیا کرے، اگر ہم سے کوئی ثبوت مانگے تو دکھا دیں گے، پیپلز پارٹی ایک جمہوری جماعت ہے جہدوجہد جاری رکھیں گے۔