پنجاب کابینہ کی جانب سے چائلڈ پروٹیکشن پالیسی کی منظوری ، بچوں کے تحفظ میں تاریخی سنگ میل

منگل 3 جون 2025 18:54

لاہور (اُردو پوائنٹ اخبارتازہ ترین - این این آئی۔ 03 جون2025ء) پنجاب کابینہ نے چائلڈ پروٹیکشن بیورو کی جانب سے تیار کردہ ’’چائلڈ پروٹیکشن پالیسی‘‘کی منظوری دے دی ہے، جسے بچوں کے تحفظ کے لیے ایک تاریخی پیش رفت قرار دیا جا رہا ہے۔چیئرپرسن چائلڈ پروٹیکشن بیورو سارہ احمد نے اس اہم اقدام پر وزیراعلیٰ پنجاب مریم نواز اور پنجاب کابینہ کا شکریہ ادا کرتے ہوئے کہا کہ پالیسی کی منظوری بچوں کے حقوق کے تحفظ کے لیے ایک تاریخی سنگ میل ہے۔

ان کا کہنا تھا کہ وزیراعلیٰ مریم نواز کی قیادت میں حکومت پنجاب بچوں کے حقوق کے حوالے سے انتہائی سنجیدہ ہے اور یہی سنجیدگی اس پالیسی کی صورت میں سامنے آئی ہے۔سارہ احمد کے مطابق چائلڈ پروٹیکشن پالیسی کی منظوری پنجاب کے بچوں کے لیے ایک اہم اور مثبت قدم ہے، جو بچوں کے تحفظ کی جانب ایک نئی روشنی کی کرن ثابت ہوگا۔

(جاری ہے)

انہوں نے مزید کہا کہ وزیراعلیٰ مریم نواز کے لیے بچوں کے حقوق کا تحفظ ہمیشہ اولین ترجیح رہا ہے۔

چیئرپرسن نے بتایا کہ چائلڈ پروٹیکشن بیورو اس پالیسی کے تحت کیس مینجمنٹ سسٹم پر ایک سال قبل ہی کام کا آغاز کر چکا ہے، جبکہ دو سال قبل یہ پالیسی ہوم ڈپارٹمنٹ کے ذریعے ارسال کی گئی تھی۔ اس پالیسی کی تیاری میں یونیسیف پاکستان کی تکنیکی معاونت بھی شامل رہی۔سارہ احمد نے کہا کہ پنجاب پاکستان کا پہلا صوبہ ہے جہاں بچوں کے حقوق کے تحفظ کے لیے باضابطہ چائلڈ پروٹیکشن پالیسی منظور کی گئی ہے۔ یہ پالیسی صوبے میں بچوں کے ساتھ بدسلوکی، زیادتی، تشدد اور استحصال کی روک تھام کے لیے ایک جامع روڈ میپ فراہم کرتی ہے۔