عمر ایوب نے سپیکر قومی اسمبلی کو خط لکھ دیا،اپنے خلاف دائر ریفرنس کی قانونی وآئینی بنیاد کی تفصیلات طلب کرلیں

اپوزیشن لیڈر نے ایاز صادق سے ریفرنس کی مکمل مصدقہ نقل اور شواہد مہیا کرنے کا مطالبہ کیا ہے، نااہلی کے ریفرنس پر آئینی نکات،آرٹیکل 62، 63 کے تحت ریفرنس کی قانونی توجیہ فراہم کی جائے، خط کا متن

فیصل علوی بدھ 4 جون 2025 11:55

عمر ایوب نے سپیکر قومی اسمبلی کو خط لکھ دیا،اپنے خلاف دائر ریفرنس کی ..

اسلام آباد(اردوپوائنٹ اخبار تازہ ترین۔04 جون 2025)پاکستان تحریک انصاف کے رہنماء اور قومی اسمبلی میں اپوزیشن لیڈر عمر ایوب نے سپیکر ایاز صادق کو خط لکھ دیا،اپنے خلاف دائر ریفرنس اور فیصلے کی تفصیلات مانگ لیں،عمر ایوب خان نے سپیکر قومی اسمبلی سے ریفرنس کی مکمل مصدقہ نقل اور شواہد مہیا کرنے کا مطالبہ کیا ہے،بتایا گیا ہے کہ اپوزیشن لیڈر عمر ایوب نے سپیکر قومی اسمبلی ایاز صادق کو نام لکھے گئے خط میں کہا ہے کہ نااہلی کے ریفرنس پر آئینی نکات،آرٹیکل 62، 63 کے تحت ریفرنس کی قانونی توجیہ فراہم کی جائے اور ریفرنس کی قانونی و آئینی بنیاد، مصدقہ نقل اور کارروائی کا ریکارڈ فراہم کریں۔

اپوزیشن لیڈرعمر ایوب نے اپنے خط میں ریفرنس پراسپیکر قومی اسمبلی کی ذہنی تسلی ثابت نہ ہونے پر اعتراض کیا ہے۔

(جاری ہے)

ان کاکہنا ہے کہ قانونی عمل، شفافیت اور منصفانہ کارروائی کیلئے تفصیلات دیں۔ اپوزیشن لیڈر نے پارلیمانی وقار اور جمہوری اعتماد کی بنیاد پر ریکارڈ فوری فراہم کرنے کا مطالبہ کیا ہے۔عمر ایوب نے اپنے خط میں سپیکر سے ریفرنس کی مکمل مصدقہ نقل اور شواہد مہیا کرنے کا مطالبہ کیا ہے جبکہ ریفرنس پر فیصلے کے دوران کی اندرونی کارروائی اور فائل نوٹنگز بھی مانگی ہیں۔

رہنماءپی ٹی آئی عمر ایوب نے تیسرے فریق کی درخواستوں کی بنیاد پر ریفرنس پر وضاحت طلب کی ہے،عمر ایوب نے کہا ہے کہ نوٹسز اور وضاحت کا موقع فراہم کرنے کی تفصیل فراہم کی جائے۔ آرٹیکل 63(2) کے تحت سپیکر کی صوابدیدی نظیریں بھی دی جائیں۔خیال رہے کہ اس سے قبل سپیکر ایاز صادق نے اپوزیشن لیڈر عمر ایوب کے خلاف ریفرنس الیکشن کمیشن کو ارسال کیاتھا۔

سپیکر قومی اسمبلی نے پی ٹی آئی سے تعلق رکھنے والے اپوزیشن لیڈر عمر ایوب کے خلاف ریفرنس پر دستخط کر دئیے تھے۔مسلم لیگ ن کے بابر نواز نے عمر ایوب کے خلاف ریفرنس اسپیکر کو بجھوایا تھا۔ ریفرنس میں عمر ایوب پر مالیاتی گوشواروں میں اثاثوں کی تفصیلات چھپانے کا الزام عائد کیاگیاتھا جس میں آرٹیکل 62، 63 کے تحت عمر ایوب کو نااہل قرار دینے کی استدعا کی گئی تھی۔

ریفرنس کے مطابق عمر ایوب نے بیرون ملک جائیدادوں کو خفیہ رکھا اور اثاثوں میں اندراج نہیں کیا۔ عمر ایوب نے 2019-20 میں سرمایہ کاری کے غرض سے یو اے ای کا اقامہ رکھا اور ظاہر نہیں کیا۔ عمر ایوب نے اقامہ سے مالی فوائد یا خسارے کا ذکر نہیں کیا عمر ایوب نے پاکستان کے ایک ادارے میں اپنے حصص اور سرمایہ کاری کو بھی گوشواروں میں ظاہر نہیں کیاتھا۔الیکشن کمیشن آ ف پاکستان نے فوری طور پر ریفرنس کی پہلی سماعت 4 جون کو مقرر کردی تھی اور عمر ایوب اور بابر نواز دونوں کو نوٹسز جاری کر دئیے گئے تھے۔