Live Updates

پنجاب حکومت سرمایہ کاری کے فروغ کیلئے پوری طرح یکسو ہے، ساجد عزیز میر

ملک میں صنعتی ترقی کے لیے سب کو مل کر کام کرنا ہوگا، صدر پاکستان بزنس فورم لاہور

بدھ 4 جون 2025 13:54

لاہور(اُردو پوائنٹ اخبارتازہ ترین - این این آئی۔ 04 جون2025ء) صدر پاکستان بزنس فورم لاہور ریجن ساجد عزیز میر نے کہا وزیر اعلی پنجاب مریم نواز شریف کی ترقیاتی کاموں کی سپیڈ اس بات کی عکاسی ہے کہ حکومت سرمایہ کاری کے فروغ کے لئے پوری طرح یکسو ہے۔یہی وجہ ہے اس وقت پنجاب میں ریکارڈ منصوبوں پر کام ہورہا ہے۔ جلد وزیراعلی پنجاب لاہور کو ایک نیا انڈسٹریل زون بھی دیں گیں جہاں نئی صنعتوں کا فروغ ممکن ہوسکے گا۔

میڈیا نمائدنگان سے بات کرتے ہوئے ان کا کہنا تھا امید ہے آنے والا وفاقی بجٹ بزنس فریڈلی ہوگا اور مزید ٹیکسز سے گریز کیا جائے گا۔ حکومت کو بھی اس بات کا ادراک ہے کہ اب ہمیں معاشی گروتھ کی طرف جانا ہے۔ پاکستان بزنس فورم نے بجٹ تجاویز دہ ماہ قبل وفاقی حکومت کو بھجوائی تھیں جس میں ایک گروتھ روڈمیپ کی سفارشات تھیں۔

(جاری ہے)

ان کا کہنا تھا پاکستان بزنس فورم تاجروں کے جائز مسائل کو ترجیحی بنیادوں پر حل کروائے گا۔

انھوں نے مزید کہا کہ صنعت کی ترقی ملکی ترقی کا باعث ہے۔ ہمیں صنعتی ترقی کے لیے مل کر کام کرنا ہوگا، حکومت اس وقت ملک میں معاشی استحکام کے لیے کام کر رہی ہے۔ پالیسی ریٹ میں کمی سے کاروبار میں استحکام آرہا ہے۔ ہم درست سمت کی جانب گامزن ہیں لیکن ہر سیکٹر کو برآمدات کرنا ہوں گی، ہمیں اپنی برآمدات میں اضافے کے لیے کام کرنا ہے۔ صدر پاکستان بزنس فورم لاہور نے زور دیا کہ 10 جون کو پیش کیا جانے والا بجٹ کاروباری ماحول کو سہارا دینے والا اور مہنگائی سے نجات دلانے والا ہونا چاہیے۔

آئندہ مالی سال میں ترقیاتی اخراجات میں 100 ارب کی کٹوتی خوش آئند ہے اور یہ وسائل دفاع اور معاشی بحالی پر مرکوز کیے جا سکیں گے۔ ان کا مزید کہنا تھا کہ جامعات کو صنعت و تجارت کے شعبے کے ساتھ قریبی رابطہ رکھنا چاہیے تاکہ طلبہ نہ صرف نوکریاں تلاش کرنے والے بنیں بلکہ روزگار فراہم کرنے والے اور لیڈر بھی بن سکیں۔ پی بی ایف اس بات پر یقین رکھتا ہے کہ پاکستان کی معاشی ترقی کا انحصار تعلیم اور صنعت کے درمیان فاصلے کم کرنے میں ہے۔