یوم ماحولیات کے موقع پر ضلع ننکانہ صاحب میں تقریبات جاری

ننکانہ صاحب (اُردو پوائنٹ اخبارتازہ ترین - اے پی پی۔ 05 جون2025ء) وزیر اعلی پنجاب مریم نواز شریف کی خصوصی ہدایت پر یوم ماحولیات کے موقع پر ضلع ننکانہ صاحب میں تقریبات جاری ہیں۔تفصیلات کے مطابق ضلعی انتظامیہ ننکانہ صاحب کی جانب سے عالمی یوم ماحولیات کے موقع پر بچیانہ روڑ سے شجرکاری مہم کا آغاز کیا گیا۔ڈپٹی کمشنر محمد تسلیم اختر راو ، ضلعی افسران اور سٹوڈنٹس نے بچیانہ روڑ کے دونوں اطراف پودے لگائے۔

ڈپٹی کمشنر محمد تسلیم اختر راو کی زیرصدارت عالمی یوم ماحولیات کے موقع پر ضلع کونسل ہال میں آگاہی سیمنار کا انعقاد کیا گیا جبکہ ضلعی انتظامیہ کے زیر اہتمام ڈی سی آفس سے گوردوارہ جنم استھان تک آگاہی ریلی بھی نکالی گئی۔ریلی کی قیادت ڈپٹی کمشنر محمد تسلیم اختر راو نے کی۔

(جاری ہے)

ایڈیشنل ڈپٹی کمشنر ریونیو رائے ذوالفقار علی ،ایڈیشنل ڈپٹی کمشنر جنرل شاہد کھوکھر ، اسسٹنٹ کمشنر عطیہ عنائیت ، ڈپٹی ڈائریکٹر ماحولیات فوزیہ اکرم ، تمام ضلعی افسران ، سٹوڈنٹس، تاجر برادری، سول سوسائٹی کے سمیت شہریوں کی بڑی تعداد بھی موجود تھی۔

تقریب کے شرکائ سے ڈپٹی کمشنر ننکانہ صاحب محمد تسلیم اختر راو نے خطاب کرتے ہوئے کہا کہ آج پاکستان سمیت دنیا بھر میں ماحولیات کے تحفظ کا عالمی دن منایا جا رہا ہے ، ماحولیات کا تحفظ ہم سب کی قومی زمہ داری ہے۔انہوں نے کہا کہ ماحولیات کا عالمی دن ہر سال ماحولیاتی آگاہی اور صفائی ستھرائی کیلئے منایا جاتا ہے۔وزیر اعلیٰ پنجاب کی قیادت میں زیرو پلاسٹک و زیرو پلوشن ڈے منایا جا رہا ہے ، دور جدید میں ماحولیات کی آلودگی میں عالمی سطح پر اضافہ ہوا ہے ، پاکستان موسمیاتی تبدیلیوں کے باعث متاثر ممالک میں شامل ہے۔

ڈپٹی کمشنر نے کہا کہ پنجاب حکومت ماحولیات کے تحفظ کیلئے انقلابی اقدامات کر رہی ہے شہریوں کو بھی ساتھ دینا ہو گا ، بحیثیت شہری ہمیں ماحولیات کے تحفظ کیلئے حکومتی اقدامات پر عمل پیرا ہونا ہے۔انہوں نے کہا کہ ہم گلی اور محلوں کو صاف رکھیں گے تو ہمارے شہر صاف ستھرے ہوں گے ، عالمی یوم ماحولیات منانے کا مقصد ماحولیات کا تحفظ اور جانداروں کو قدرتی ماحول کی فراہمی ہے۔

ڈپٹی کمشنر نے کہا کہ دھواں چھوڑتی گاڑیوں کے خلاف کریک ڈاون اور شاپر بیگز پر پابندی پر عملدرآمد یقینی بنانا ہو گا ، انسان اور ماحولیات کا تحفظ ضروری ہے قدرتی ماحول کے بغیر زندگی کا وجود ناممکن ہے۔ اس موقع پر ڈپٹی کمشنر ننکانہ صاحب محمد تسلیم اختر راؤ نے اے پی پی سے خصوصی طور پر گفتگو کرتے ہوئے کہا کہ ماحول کو حکومت ، انتظامیہ اور شہری ملکر ہی صاف بنا سکتے ہیں۔انہوں نے مزید کہا کہ ماحول کو صاف ستھرا بنانے کے لیے ہمیں درخت لگانا ہونگے اور صفائی ستھرائی پر خصوصی توجہ دینا ہو گی۔ \378