میرا دل اس بات پر راضی نہیں کہ ثناء یوسف کا قتل میرے بیٹے نے کیا ہے، والد ملزم عمر حیات عرف کاکا

فیصل آباد(اردوپوائنٹ اخبار تازہ ترین۔09 جون 2025)ٹک ٹاکر ثناءیوسف کو قتل کرنے والے ملزم عمر حیات عرف کاکا کے والد امجد کا کہنا ہے کہ میرا دل اس بات پر راضی نہیں کہ ثناءیوسف کا قتل میرے بیٹے نے کیا ہے،ملزم کے والد نے بیٹے کے قتل میں ملوث ہونے سے انکار کردیا،اپنے ایک انٹرویو میں ملزم عمر حیات کے والد امجد نے کہا کہ مجھے قتل کے بارے میں کچھ نہیں پتہ حتیٰ کہ مجھے بیٹے کے ثناءیوسف سے تعلق اور دوستی کا علم تک نہیں تھا۔

میں نے بھی ویڈیو میں دیکھا ہے کہ میرا بیٹا ثناء یوسف کے گھر سے باہر نکلتا ہے لیکن اس نے فائرنگ کی۔ ثناء یوسف سے اس کا کیا تعلق تھا وہ ثنا ءکے گھر کیوں گیا؟ اور ثناءکو قتل کیا۔ میرا دل نہیں مانتا۔ اصل صورتحال اللہ ہی جانتا ہے۔انہوں نے کہا کہ اگر میرا بیٹا قتل میں ملوث ہے تو اس کو قانون کے مطابق ضرور سزا ملنی چاہیے لیکن مجھے انصاف چاہیے اپنے بیٹے کیلئے نہیں بلکہ اس معصوم لڑکی کیلئے بھی جس کا قتل ہوا ہے پھر چاہے وہ قتل میرے بیٹے نے یا کسی نے بھی کیا ہو میں اس کی مذمت کرتا ہوں۔

(جاری ہے)

ملزم عمر حیات عرف کاکا کے والد کا مزید یہ بھی کہنا ہے کہ ویڈیو بہت چھوٹی سی ہے اس میں نہیں دیکھا گیا کہ میرے بیٹے نے قتل کیا بھی ہے یا نہیں۔ میں نہیں مانتا کہ میرے بیٹے نے ثناءیوسف کا قتل کیا ہے۔واضح رہے کہ چند روز قبل ٹک ٹاکر ثناءیوسف کے قتل کے ملزم کو پولیس نے گرفتار کیاگیاتھا۔ملزم کا تعلق پنجاب سے تھا جسے پولیس نے رات گئے گرفتار کیاتھا۔

ملزم کی شناخت عمر حیات عرف کاکا کے نام سے ہوئی تھی ملزم نے خود کو مقتولہ کا دوست بتایا تھا۔پولیس ذرائع کامزید کہنا تھا کہ ملزم کا کا فیصل آباد فرار ہو گیاتھا ملزم کو فیصل آباد سے حراست میں لیا گیا تھا ۔پولیس نے قتل میں استعمال ہونے والا پستول بھی برآمد کرلیا۔پولیس ذرائع کاکہنا تھا کہ ملزم کو سی سی ٹی وی ویڈیو اور جدید ٹیکنالوجی کی مدد سے گرفتار کیا گیا تھا۔

ورثا سے شناخت کے بعد دیگر قانونی کارروائی عمل میں لائی جائے گی۔ بعدازاں ٹک ٹاکر ثناء یوسف کے قتل کیس میں گرفتار مرکزی ملزم عمر حیات کے تفتیش میں اہم انکشافات کئے تھے ۔ ملزم نے قتل کی وجوہات بھی بتا دیں تھیں۔ ملزم نے جرم کا اعتراف کرتے ہوئے ثناءیوسف کو قتل کرنے کی تمام تفصیلات بتا ئی تھیں۔ملزم نے اپنے ابتدائی بیان میں بتایاتھا کہ مجھے اس بات کا رنج تھا کہ وہ مجھ سے نہیں ملی اسی دکھ میں میں نے اسے مار دیاتھا۔

بتایاگیا تھا کہ2 جون کوٹک ٹاکرثناءیوسف کی سالگرہ کے موقع پرملزم عمر حیات تحائف اور کیک لے کر پہنچا تھا مگر ثناءنے اسے ملنے سے صاف انکار کر دیاتھا۔ملزم سے ہونے والی تحقیقات کے مطابق عمر حیات فیصل آباد سے کرائے پر لی گئی فارچونر گاڑی کے ذریعے اسلام آباد پہنچاتھا وہ پہلے 29 مئی اور پھر 2 جون کو ثناءیوسف سے ملنے اسلام آباد آیاتھا تاہم مقتولہ ثناءیوسف نے دونوں بار ملاقات سے انکار کیاتھا۔

ذرائع کے مطابق عمر حیات نے گاڑی کا کرایہ بھی ادا نہیں کیاتھا جس پر رینٹ اے کار کے مالک نے ملزم کی گرفتاری کے بعد پولیس کارروائی کے دوران پیسے وصول کرنے کیلئے خود سامنے آ کر دعویٰ کیا تھا۔ ذرائع کا کہنا تھا کہ قتل کے بعد عمر حیات جائے واردات سے فرار ہوگیا اس نے پہلے بائیک رائیڈ بک کی پھر راستے میں اتر کر ایک ٹیکسی کے ذریعے اسلام آباد کے لاری اڈے پہنچاجہاں سے وہ فیصل آباد روانہ ہو گیاتھا۔ پولیس کی جانب سے کیس کی مزید تحقیقات جاری ہیں جب کہ موبائل ڈیٹا، گاڑی کی سی سی ٹی وی فوٹیجز اور دیگر شواہد بھی حاصل کئے جا رہے ہیں تاکہ کیس کو منطقی انجام تک پہنچایا جا سکے۔