عیدالاضحی صفائی مہم کے اعداد و شمار جاری،عوام کی جانب سے کامیاب صفائی مہم کی پذیرائی

پشاور(اُردو پوائنٹ اخبارتازہ ترین - این این آئی۔ 09 جون2025ء) حکومت خیبرپختونخوا کی جانب سے عیدالاضحی کے موقع پر صوبے بھر میں آلائشوں کی صفائی اور ان کے محفوظ طریقے سے تلفی کے لیے ایک منظم مہم چلائی گئی جو کامیابی سے ہمکنار رہی۔مہم کے حوالے سے پی ایم آر یو، چیف سیکرٹری آفس کی جانب سے ایک رپورٹ جاری کی گئی جس کے مطابق مہم کے دوران مجموعی طور پر 24,939 ٹن آلائشیں جمع کر کے محفوظ طریقے سے ٹھکانے لگائی گئیں۔

مہم سات کروڑ پچاسی لاکھ کی کل لاگت سے سر انجام پائی۔ تفصیلات کے مطابق صوبے بھر میں 11,309 اہلکار تعینات کئے گئے، جن میں سے 95 فیصد ڈیوٹی پر حاضر رہے۔ مہم کے دوران 2,294 گاڑیاں استعمال کی گئیں اور شہریوں کی جانب سے موصول ہونے والی 1,289 شکایات میں سے 1,288 شکایات کا کامیابی سے ازالہ کیا گیا، جو کہ 99.9 فیصد کی شرح کو ظاہر کرتا ہے۔

(جاری ہے)

رپورٹ کے مطابق ضلع پشاور میں سب سے زیادہ10,944 ٹن آلائشیں ٹھکانے لگائی گئیں۔

ڈی آئی خان میں2,900 ٹن، مردان2,635 ٹن اور سوات میں2,059 ٹن آلائشیں اٹھائی گئیں۔دوسری طرف کرم، کوہستان لوئر اور تورغر میں صرف 4 ٹن آلائشیں جمع کی گئیں۔ پشاور میں 4,073 اہلکار وں نے صفائی مہم میں حصہ لیاجبکہ سوات میں888 اور مردان میں 855اہلکاروں نے خدمات سرانجام دیں۔ شمالی وزیرستان میںسب سے کم صرف 4اہلکاروںنے مہم میں حصہ لیا۔ صفائی عملہ کی حاضری کے اعداد کو مطابق مردان میں 62 جبکہ پشاور میں 22کی غیر حاضری رپورٹ ہوئی، تاہم 28 اضلاع میں عملے کی 100 فیصد حاضری رہی۔

اسی طرح شکایات کے ا زالے کے حوالے سے بھی مہم مؤثر رہی۔ پشاور کو سب سے زیادہ 594 جبکہ مردان کو 228شکایات موصول ہوئیںاور تقریباً تمام شکایات کا بروقت ازالہ کیا گیا۔ مہم کے دوران تورغر، شانگلہ، اورکزئی اور شمالی وزیرستان میں سب سے کم مالی اخراجات ہوئے، جن کی مجموعی لاگت بالترتیب 55,000، 30,000، 50,000 اور 15,000 روپے رہی۔رپورٹ کے مطابق شکایات کے بروقت ازالے، بہتر حاضری، مؤثر فضلہ تلفی اور کم لاگت کے ساتھ یہ مہمکامیاب رہی۔ سوات اور جنوبی وزیرستان لوئرکے چند علاقوں میں رسائی جبکہ مردان اور پشاور میںعملہ غیر حاضری کے مسائل سامنے آئے، تاہم مجموعی طور پر یہ مہم کامیاب ثابت ہوئی اور عوام کو بہتر صفائی کی سہولیات فراہم کی گئیں۔