بجٹ 2025-26، صحت کے شعبے کے 21 منصوبوں کے لیے 14.3 ارب روپے مختص کرنے کی تجویز

منگل 10 جون 2025 21:30

اسلام آباد (اُردو پوائنٹ اخبارتازہ ترین - اے پی پی۔ 10 جون2025ء) وفاقی حکومت نے مالی سال 2025-26 کے لیے پبلک سیکٹر ڈویلپمنٹ پروگرام میں صحت کے شعبے کے 21 اہم منصوبوں کے لیے 14.3 ارب روپے مختص کر دیے، جو گزشتہ برس کی نسبت نمایاں اضافہ ہے۔منگل کے روز بجٹ تقریر کے دوران وزیر خزانہ سینیٹر محمد اورنگزیب نے قومی اسمبلی کو بتایا کہ یہ رقم بیماریوں کے مؤثر تدارک، جدید طبی انفراسٹرکچر کے قیام اور تمام شہریوں کو یکساں طبی سہولیات کی فراہمی کو یقینی بنانے کے لیے خرچ کی جائے گی۔

انہوں نے کہا کہ جناح میڈیکل کمپلیکس اینڈ ریسرچ سینٹر، اسلام آباد کے قیام کے لیے 4 ارب روپے مختص کیے گئے ہیں۔ یہ منصوبہ وفاقی دارالحکومت میں ایک فلیگ شپ ٹیریٹری کئیراور ٹیچنگ فیسلٹی کے طور پر قائم کیا جائے گا۔

(جاری ہے)

انہوں نے کہا کہ ہیپاٹائٹس سی کے خاتمے کے لیے وزیراعظم پروگرام کے تحت 1 ارب روپے مختص کیے گئے ہیں۔ اس منصوبے کے ذریعے ملک گیر اسکریننگ اور علاج معالجے کی سہولتیں فراہم کی جائیں گی۔

شوگر کی روک تھام اور کنٹرول پروگرام کے لیے 80 کروڑ روپے رکھے گئے ہیں تاکہ غیر متعدی امراض (NCDs) سے نمٹنے میں مدد ملے۔انہوں نے کہا کہ اسلام آباد میں کینسر اسپتال کے قیام کے لیے 1.7 ارب روپے جبکہ ضروری طبی آلات کی خریداری کے لیے 90 کروڑ روپے مختص کیے گئے ہیں۔پمز اسلام آباد میں ایک جدید Stroke Intervention Centre کے قیام، Critical Care اور Cardiac Facilities کی توسیع کے لیے بھی 90 کروڑ روپے رکھے گئے ہیں، جس کا مقصد ایمرجنسی رسپانس کی صلاحیت کو بہتر بنانا ہے۔وزیر خزانہ نے کہا کہ یہ تمام منصوبے مضبوط، جامع اور پائیدار صحت کے نظام کی تشکیل کی جانب ایک اہم قدم ہیں، جو پاکستان کی سماجی و اقتصادی ترقی کے لیے ناگزیر ہے۔