جلاؤ گھیراؤ مقدمات ،علیمہ خان اور عظمیٰ خان کی ضمانت منظور،عدالت کا بار بار ضمانتوں پر اظہار برہمی

لاہور(اردوپوائنٹ اخبار تازہ ترین۔13جون 2025)انسداد دہشتگردی عدالت لاہور نے جلاؤ گھیراؤ مقدمات میں بانی پی ٹی آئی کی بہنوں علیمہ خان اور عظمیٰ خان کی ضمانتیں منظور کرلیں،عدالت کا بار بار ضمانتوں پر اظہار برہمی،اے ٹی سی عدالت کے جج ارشد جاوید کی عدالت میں 5 اکتوبر کے جلاؤ گھیراؤ واقعات سے متعلق مقدمات کی سماعت ہوئی۔ عدالت نے علیمہ خان اور عظمیٰ خان کی عبوری ضمانتیں کنفرم کرتے ہوئے ان سے آئندہ پیشی پر مکمل تعاون کی ہدایت کی۔

دوران سماعت عدالت نے ریمارکس دیئے کہ پچھلی سماعت پر بھی آپ نے کہا وہ فیصل آباد ہیں، سال ہا سال بیل چلا کر عدالتوں کا نام خراب نہ کریں۔ آپ فیصل آباد کی حاضری کا کہہ کر مسلسل تاریخیں لیتے رہے۔ آپ جان بوجھ کر بیل لمبی کر رہے ہیں۔ آپ جان بوجھ کر عدالت میں پیش نہیں ہوتے۔

(جاری ہے)

کورٹ میں آنا پسند نہیں کر رہیں تو پولیس کے پاس کیسے جائیں گی؟۔جج ارشد جاوید نے وکلا کو مخاطب کرتے ہوئے کہا کہ سالہا سال بیل چلا کر عدالتوں کا وقار مجروح نہ کریں، قانون کی پاسداری سب پر لازم ہے۔

آپ لوگ جان بوجھ کر بیل لمبی کر رہے ہیں عدالت میں پیش ہونے سے گریز کرتے ہیں۔عدالت نے مزید کہا کہ یہی رویہ شاہ محمود قریشی کی ضمانت میں بھی اپنایا گیا۔ آٹھ ماہ تک بیل چلائی گئی اور پھر عدم پیروی پر کیس خارج ہو گیا۔کیس کی باقاعدہ سماعت آئندہ تاریخ پر جاری رہے گی۔ بانی پی ٹی آئی کی بہنوں علیمہ اور عظمیٰ خان کیخلاف جلاؤ گھیراؤ کے مقدمات درج ہیں جن میں انہیں عدالت کی جانب سے عبوری ضمانت کا تحفظ مل چکا ہے۔

واضح رہے کہ اس سے قبل انسداد دہشت گردی کی عدالت نے 5 اکتوبر کے جلاؤ گھیراؤ کیس میں بانی پی ٹی آئی کی بہنوں علیمہ خان اور عظمیٰ خان کی ضمانتوں میں توسیع کر دی تھی۔اے ٹی سی عدالت کے جج ارشد جاوید نے مقدمات کی سماعت کی تھی۔ عدالت نے عمران خان کی بہنوں علیمہ خانم اور عظمیٰ خان کی ایک روزہ حاضری معافی منظور کر لی تھی۔وکلا نے کہا کہ دونوں خواتین فیصل آباد عدالت میں پیش ہوئی تھیں۔

عدالت کاکہناتھاکہ فیصل آباد عدالت میں پیش ہو رہی ہیں تو ٹھیک ہے اگر فیصل آباد میں کوئی کیس نہ ہوا تو ان کی عبوری ضمانتیں خارج کریں گے۔ جھوٹی درخواست دینے پر کارروائی بھی کی جائے گی۔قبل ازیں بھی انسداد دہشت گردی عدالت لاہور نے علیمہ خان اور عظمیٰ خان کی عبوری ضمانتوں میں توسیع کر دی تھی۔پانچ اکتوبر، جلاو گھیراو کے دو مقدمات میں بانی پی ٹی آئی عمران خان کی بہنوں علیمہ خانم اور عظمیٰ خان کی عبوری ضمانتوں کیلئے درخواستوں پر سماعت جج ارشد جاوید نے کی تھی۔

بانی پی ٹی آئی کی بہنیں علیمہ اور عظمیٰ خان عدالت میں پیش نہیں ہوئیں تھیں۔ وکلائنے ایک روزہ حاضری معافی کی درخواست دائر کی جسے عدالت نے منظور کر لیاگیاتھا۔بعدازاں عدالت نے 30 مئی تک عبوری ضمانتوں میں توسیع کر دی تھی۔