آیت اللہ خامنہ ای نے دو اہم فوجی تقرریاں کر دیں، بریگیڈیئر جنرل احمد وحیدی پاسداران انقلاب کے قائم مقام کمانڈر انچیف مقرر

 تہران(اردوپوائنٹ اخبار تازہ ترین۔13جون 2025)ایران کے سپریم لیڈر آیت اللہ خامنہ ای نے اسرائیل کی جانب فضائی حملوں کے بعددو اہم عبوری فوجی تقرریاں کر دیں،  ایگزیکٹو آرڈر کے ذریعے بریگیڈیئر جنرل احمد وحیدی کو جنرل حسین سلامی کی جگہ پاسداران انقلاب کا قائم مقام کمانڈر انچیف مقرر کر دیا گیا جبکہ ایڈمرل امیر حبیب اللہ سیاری کو ایران کی مسلح افواج کا نیا سربراہ مقرر کیا گیا ہے، ایڈمرل حبیب اللہ سیاری کو جاں بحق ہونے والے میجر جنرل محمد باقری کا جانشین مقرر کیا گیا۔

اسرائیلی حملوں میں ایران کے آرمی چیف سمیت اہم عسکری اور سائنسی شخصیات جاں بحق ہوگئیں تھیں۔ایرانی سرکاری میڈیا نے تصدیق کی ہے کہ ان حملوں میں ایران کے آرمی چیف جنرل محمد حسین باقری جاں بحق ہو گئے تھے۔

(جاری ہے)

پاسداران انقلاب اسلامی کی اپنی زمینی، بحری اور فضائی افواج ہیں جن میں مجموعی طور پر ایک لاکھ 90 ہزار اہلکار ہیں۔ پاسداران انقلاب ایران کے بلیسٹک میزائل اور ایٹمی پروگراموں کی بھی نگرانی کرتا ہے۔

یہ بھی بتایاگیا تھا کہ میجر جنرل حسین سلامی نے 1980 میں ایران،عراق جنگ کے آغاز پر پاسداران انقلاب میں شمولیت اختیار کی تھی۔ وقت کے ساتھ وہ فوجی رینکس میں ترقی کرتے گئے اور امریکہ و اس کے اتحادیوں کے خلاف سخت بیانات دینے کے حوالے سے مشہور ہوئے تھے۔سن 2000 کی دہائی سے وہ اقوامِ متحدہ کی سلامتی کونسل اور امریکہ کی جانب سے ایران کے جوہری اور فوجی پروگراموں میں کردار کے سبب پابندیوں کی زد میں رہے تھے۔

میجر جنرل حسین سلامی 2024 میں پاسداران انقلاب کے سربراہ کے طور پر خدمات انجام دے رہے تھے جب ایران نے تاریخ میں پہلی بار اسرائیل پر براہ راست فوجی حملہ کیاتھا جس میں 300 سے زائد ڈرونز اور میزائل فائر کئے گئے تھے۔واضح رہے کہ اس سے قبل اسرائیل نے ایران پر بڑا حملہ کردیاتھا جس کے نتیجے میں ایرانی مسلح افواج کے سربراہ میجر جنرل محمد باقری اور ایرانی پاسداران انقلاب کے سربراہ میجر جنرل حسین سلامی اور 6 جوہری سائنسدان جاں بحق ہوگئے تھے۔

اسرائیل نے حملے میں ایران کے جوہری اور عسکری مراکز کو نشانہ بنانے کا دعویٰ کیا تھا جبکہ ایرانی میڈیا کے مطابق حملوں میں خواتین اور بچوں سمیت 5 شہری شہید اور 50 زخمی ہوئے تھے۔ خبر رساں ایجنسی کے مطابق اسرائیل نے ایران میں درجنوں مقامات پرفضائی حملے کئے تھے۔ دارالحکومت تہران کے  شمال مشرقی علاقے میں بھی دھماکوں کی زور دار آوازیں سنی گئیں تھیں اور بعض مقامات سے دھویں کے بادل اٹھتے دکھائی دئیے تھے۔

ایرانی میڈیا نے تصدیق کی تھی کہ اسرائیلی حملے میں پاسداران انقلاب کے سربراہ میجر جنرل حسین سلامی اور جوہری سائنسدان فریدعباسی اور محمد مہدی جاں ہوگئے تھے۔اس کے علاوہ ختم الانبیا ہیڈ کوارٹر کے کمانڈر میجر جنرل غلام علی راشد کی بھی ان حملوں میں جاں بحق ہونے کی تصدیق کر دی گئی تھی۔