نائب وزیراعظم و وزیر خارجہ سینیٹر محمد اسحاق ڈار کی زیر صدارت اجلاس، حضرت بری امام سرکار کا عرس مبارک 8 سے 10 اگست کو ہو گا

ہفتہ 14 جون 2025 16:33

اسلام آباد (اُردو پوائنٹ اخبارتازہ ترین - اے پی پی۔ 14 جون2025ء) نائب وزیراعظم و وزیر خارجہ سینیٹر محمد اسحاق ڈار کی زیر صدارت اجلاس میں فیصلہ کیا گیا ہے کہ حضرت بری امام سرکار کا عرس مبارک 8 سے 10 اگست کو ہو گا جبکہ 7 اگست کو مزار پر چادر پوشی کی تقریب ہو گی۔ ہفتہ کو دفتر خارجہ سے جاری بیان کے مطابق نائب وزیراعظم اور وزیر خارجہ سینیٹر محمد اسحاق ڈار کی سربراہی میں حضرت بری امام کے مزار کی مینجمنٹ اور ڈویلپمنٹ کے حوالے سے قائم کمیٹی کا اجلاس منعقد ہوا۔

اجلاس میں وفاقی وزیر ریلوے حنیف عباسی، نائب وزیراعظم آفس کے وزیراعظم کے معاون خصوصی، سیکرٹری داخلہ لیفٹیننٹ جنرل (ر) افضل جنجوعہ، راجہ سرفراز اکرم، گوہر زاہد ملک، سہیل بھٹی، ایمان ربانی، محسن رضا نقوی اور ڈپٹی کمشنر اسلام آباد نے شرکت کی۔

(جاری ہے)

نائب وزیراعظم و وزیر خارجہ نے اس موقع پر کمیٹی ممبران کی اس اہم روحانی مزار کی ترقی اور اس کو محفوظ بنانے کیلئے ان کے عزم کو سراہا۔

کمیٹی نے فیصلہ کیا کہ 7 اگست 2025 کو چادر پوشی کی تقریب کا انعقاد کیا جائے گا جبکہ حضرت بری امام سرکار کا عرس مبارک 8 سے 10 اگست 2025 کے درمیان ہو گا۔ نائب وزیراعظم نے وزیر ریلوے کی سربراہی میں ایک ذیلی کمیٹی قائم کرنے کی ہدایت کی جو مزار کے تعمیراتی کام، اس کی دیکھ بھال اور مرمت سے متعلقہ امور کی نگرانی کرے گی تاکہ اس کے تقدس اور تاریخی حیثیت کو برقرار رکھا جا سکے۔