Live Updates

فرمان رسول ﷺہے’’ جنت میں میرارفیق عثمان غنی ہوگا‘‘،خلیفہ سوئم کی سیرت اعلی ،ثروت وسخاوت میں بھی کردارمثالی تھا،محمدسلیم عطاری

ہفتہ 14 جون 2025 19:01

کراچی (اُردو پوائنٹ اخبارتازہ ترین - این این آئی۔ 14 جون2025ء) خلیفہ سوم سیدنا عثمان غنی رضی اللہ تعالیٰ عنہ کی مناسبت انجمن نوجوانان اسلام پاکستان کے سربراہ سماجی رہنمامحمدسلیم عطاری نے مختلف مقامات پرمنعقدہ سیمینارسے سیرت وفضائل بیان کرتے ہوئے کہاکہ سرکاردوعالم ﷺنے حضرت عثمان غنی رضی اللہ تعالیٰ عنہ کو کئی بارجنت کی بشارت دی ،آپ کو’’ عشرہ مبشرہ ‘‘صحابہ کرام میں شامل ہونے کی سعادت حاصل ہے۔

سرکادوعالم ﷺکی دوبیٹیوں یکے بعد دیگرے نکاح کی وجہ سے آپ کو’’ ذوالنورین ‘‘کہاجاتاہے۔آپ حافظ قرآن ،جامع قرآن ،کاتب وحی بھی ہیں۔سرکاردوعالم ﷺنے فرمایاجنت میں ہرنبی کاایک ساتھی ورفیق ہوتاہے ’’ جنت میں میرا رفیق عثمان غنی ہوگا ‘‘آپ اعلیٰ سیرت وکردارکے ساتھ سخاوت میں بے مثال تھے ۔

(جاری ہے)

محمدسلیم عطاری نے کہاکہ سرکاردوعالم ﷺنے حضرت عثمان غنی رضی اللہ تعالیٰ عنہ کی شہادت کی خبر پہلے ہی دے دی تھی،اس واقعہ سے اندازہ لگایاجاسکتاہے ’’نبی کریم ﷺاحدکے پہاڑپرچڑھے اورآپ کے ساتھ حضرت ابوبکرصدیق ،حضرت عمرفاروق اورحضرت عثمان غنی تھی(رضی اللہ تعالیٰ عنہم)،پہاڑہلنے لگا توآپ ﷺنے اپنے پاؤں سے اسکو اشارہ کیااورفرمایا !اے احدٹہر جا،تیرے اوپر ایک نبی ،ایک صدیق اوردوشہیدہیں‘‘ خلیفہ سوم حضرت عثمان غنی کوروزہ کی حالت میں قرآن مجیدکی تلاوت کرتے ہوئے شہید کیاگیا ۔

محمدسلیم عطاری نے کہاکہ اہل بیت اطہار،صحابہ کرام کی زندگیاںاللہ اوراسکے رسول ﷺسے محبت اوربے شمارقربانیوں میں گزری ،ان حالات وواقعات ہمارے لئے دعوت فکر دیتی ہے۔