ایران کو اپنے دفاع کا پورا حق حاصل ہے، اقوام متحدہ میں پاکستانی مندوب کا دو ٹوک بیان

ہفتہ 14 جون 2025 19:36

نیویارک (اُردو پوائنٹ اخبارتازہ ترین - آن لائن۔ 14 جون2025ء)اقوام متحدہ کی سلامتی کونسل کے اجلاس میں پاکستان کے مستقل مندوب عاصم افتخار نے اسرائیل کی حالیہ کارروائیوں پر شدید مذمت اور ایران کے ساتھ مکمل یکجہتی کا اظہارکرتے ہوئے کہا ہے کہ اسرائیل بین الاقوامی قوانین اور اقوام متحدہ کے چارٹر کی سنگین خلاف ورزیاں کر رہا ہے‘اسرائیلی حملے ایران کی خودمختاری اور علاقائی سالمیت کی کھلی خلاف ورزی ہیں۔

اسرائیلی حملے اقوام متحدہ کے منشور اور بین الاقوامی قانون کے بنیادی اصولوں کے منافی ہیں۔عاصم افتخار نے کہا کہ ایران کو اقوام متحدہ کے چارٹر کے تحت اپنے دفاع کاحق حاصل ہے، اسرائیل کا ایران پر حملہ اقوام متحدہ کے چارٹر اور بین الاقوامی خودمختاری کے اصولوں کی خلاف ورزی ہے۔

(جاری ہے)

انہوں نے کہا کہ ایسے اقدامات نہ صرف خطے بلکہ دنیا بھر میں امن و سلامتی کے لیے شدید خطرہ بن سکتے ہیں۔

انہوں نے مزید کہا کہ اسرائیل نے غزہ میں نہتے شہریوں اور معصوم بچوں کو بے دردی سے قتل کیا، جس کی جتنی بھی مذمت کی جائے کم ہے۔ عالمی برادری کو اسرائیلی جارحیت کو روکنے کے لیے فوری اور مؤثر اقدامات اٹھانے ہوں گے۔پاکستانی مندوب نے زور دیا کہ سلامتی کونسل کو اپنی ذمہ داریوں کا ادراک کرتے ہوئے اسرائیل کے خلاف سخت مؤقف اختیار کرنا چاہیے تاکہ مشرق وسطی میں پائیدار امن کو یقینی بنایا جا سکے۔

عاصم افتخارنے کہا کہ پاکستان اشتعال انگیزیوں کی غیر مبہم الفاظ میں مذمت کرتا ہے، اسرائیلی اشتعال انگیزی پورے خطے اور باہر امن، سلامتی اور استحکام کے لیے سنگین خطرہ ہے۔اسرائیلی حملے اور اشتعال انگیزیاںسنگین نتائج کی حامل ہیں۔ایران کو اقوام متحدہ کے منشور کے آرٹیکل 51 کے تحت اپنے دفاع کا پورا حق حاصل ہے۔