آئندہ چوبیس گھنٹوں کے دوران ملک کے مختلف مقامات پر آندھی / جھکڑ چلنے اور گرج چمک کے ساتھ بارش کا امکان ہے، محکمہ موسمیات

ہفتہ 14 جون 2025 22:43

اسلام آباد (اُردو پوائنٹ اخبارتازہ ترین - اے پی پی۔ 14 جون2025ء) آئندہ چوبیس گھنٹوں کے دوران شمال مشرقی/جنوبی پنجاب، بالائی خیبر پختونخوا، بالائی/جنوب مشرقی سندھ، شمال مشرقی بلوچستان، کشمیر اور گلگت بلتستان میں مطلع جزوی ابر آلود رہنے کے علاوہ چند مقامات پر آندھی / جھکڑ چلنے اور گرج چمک کے ساتھ بارش کا امکان ہے۔اس دوران بعض مقامات پر ژالہ باری بھی ہو سکتی ہے تاہم ملک کے بیشتر علاقوں میں موسم گرم اور خشک جبکہ میدانی علاقوں میں شدید گرم رہنے کی توقع ہے۔

رپورٹ کے مطابق گزشتہ 24 گھنٹوں کے دوران ملک کے بیشتر علاقوں میں موسم گرم اور خشک جبکہ میدانی علاقوں میں شدید گرم رہا جبکہ بالائی پنجاب، بالائی خیبرپختونخوا، کشمیر اور گلگت بلتستان میں چند مقامات پر تیز ہواؤں اور گرج چمک کے ساتھ بارش ہوئی۔

(جاری ہے)

سب سے زیادہ بارش گجرات میں 12، منگلا 6، سیالکوٹ (ایئرپورٹ 4 اور سٹی 2)، اسلام آباد (سٹی 2 اور سید پور ایک)، مری ایک، میر کھانی 3، کالام ، دیر (بالائی)، دروش اور راولاکوٹ 2، گوپس 3 اور بگروٹ میں ایک ملی میٹر بارش ریکارڈ کی گئی۔

ہفتہ کو ریکارڈ کئے گئے زیادہ سے زیادہ درجہ حرارت کی رپورٹ کے مطابق تربت اور پسنی میں درجہ حرارت 49، جیکب آباد 48، بہاولنگر 47، سبی، سکھر، روہڑی، موہنجو داڑو میں 46 ڈگری سینٹی گریڈ ریکارڈ کیا گیا ہے۔ محکمہ موسمیات نے کہا ہے کہ پیر 16 جون تک آندھی/ جھکڑ / ژالہ باری/ گرج چمک اور تیز / موسلادھار بارش کے باعث کمزور انفرا سٹرکچر کو نقصان کا اندیشہ ہے۔