حضرت عثمان غنی ؓ کی زندگی ایمان ،حیااور قربانی کا روشن مینار ہے،مفتی محمد عثمان پسروری

اتوار 15 جون 2025 21:40

ملتان (اُردو پوائنٹ اخبارتازہ ترین - اے پی پی۔ 15 جون2025ء) ممتاز مذہبی سکالر مفتی محمد عثمان پسروری نے کہا ہے کہ سیدنا عثمان غنی ؓ خلیفہ راشد ثالث ،کاتب وحی ،پیکر شرم وحیاء، داماد رسول اکرم محمد(صل اللہ علیہ و آلہ وسلم) اور ہم زلف حضرت علی مرتضیٰ ؓ تھے،آپ اسلامی تاریخ کی بے مثال شخصیت ہیں، آپ کا دور خلافت بے مثال اصطلاحات سے عبارت ہے،آپ کو متعددبار جنت کی بشارت ملی،حضرت عثمان غنی ؓ حافظ قرآن ،جامع القرآن بھی تھے، آپ کا دور خلافت امت مسلمہ کیلئے مشعل راہ ہے۔

ان خیالات کا اظہار انہوں نے جامعہ غوثیہ ہدایت القرآن ممتاز آباد میں بزم غوثیہ کے زیراہتمام یوم سیدنا عثمان غنی ؓ پر منعقدہ تقریب سے خطاب کرتے ہوئے کیا۔انہوں نے کہا کہ حضرت عثمان غنی ؓ کی زندگی ایمان ،حیااور قربانی کا روشن مینار ہے۔

(جاری ہے)

تقریب میں صاحبزادہ محمد فاروق پسروری،علامہ مفتی عطاءمحمد نقشبندی، علامہ محمد امتیاز سیالوی، علامہ عمران یٰسین قادری، علامہ قاری محمد رمضان،علامہ خدا بخش فیضی، راجہ بشیر احمد ہدایتی، سید حسنین شاہ بخاری،علامہ عرفان رضوی، قاری محمد زاہد اور دیگر بھی شریک ہوئے۔

علاوہ ازیں دعوت ذکروفکر ڈیرہ اللہ ھو والا نیو ملتان میں بسلسلہ شہادت خلیفہ سوئم ذوالنورین حضرت عثمان غنیؓ محفل کا انعقاد ہوا۔اس موقع پر خطاب کرتے ہوئے خواجہ محمد یوسف نقشبندی نے کہا کہ داماد رسول اور تیسرے خلیفۃ المسلمین حضرت عثمان غنیؓ نے اپنی شہادت کے ذریعے ہمیں جو سبق دیا اسے ہم نے بھلادیا ہے،حضرت عثمان غنیؓ نے اپنی جان قربان کردی لیکن کسی مسلمان کا خون بہانا پسند نہیں کیا،حضرت عثمان غنیؓ نے اپنی ساری دولت اللہ کے رسول حضرت محمد ﷺ کے لیے وقف کررکھی تھی،خواجہ محمد یوسف نقشبندی نے کہا کہ ہم لوگوں کوبھی حضرت عثمان غنیؓ کی طرح سخاوت کرنی چاہیے تاکہ ہم اپنے رب کواپنی چھوٹی سی کاوش سے خوش کرسکیں۔

اس دوران ملکی سلامتی و ترقی،افواج پاکستان اور کشمیر،فلسطین سمیت دنیا بھر کے مسلمانوں کیلئے خصوصی دعا کی گئی۔