نئی مانیٹری پالیسی کا اعلان، شرح سود 11 فیصد پر برقرار رکھنے کا فیصلہ

کراچی ( اُردو پوائنٹ اخبارتازہ ترین۔ 16 جون 2025ء ) اسٹیٹ بینک نے شرح سود 11 فیصد پر برقرار رکھنے کا اعلان کردیا۔ تفصیلات کے مطابق اسٹیٹ بینک کی مانیٹری پالیسی کمیٹی کا اجلاس ہوا جس میں گزشتہ ماہ مئی کو ہوئے اجلاس میں پالیسی ریٹ کو برقرار رکھنے کا فیصلہ کیا گیا، سابقہ اجلاس میں 100 بیسس پوائنٹس کی کمی کرتے ہوئے شرح سود کو 11 فیصد کی گئی تھی جو مارچ 2022ء کے بعد سب سے کم شرح ہے جب کہ جون 2023ء کے بعد سے اب تک شرح سود میں مجموعی طور پر 1100 بیسس پوائنٹس کی کمی کی کی گئی ہے۔

بتایا گیا ہے کہ مالیاتی ماہرین کی جانب سے پہلے ہی پالیسی ریٹ کو 11 فیصد پر برقرار رکھنے کی امید ظاہر کی گئی تھی کیوں کہ عالمی خطرات اور داخلی پالیسی کو مد نظر رکھتے ہوئے مرکزی بینک کی جانب سے اسی پالیسی کی توقع کی جارہی تھی کیوں کہ خطے مین جاری حالیہ کشیدگی نے بین الاقوامی منڈی میں تیل کی قیمتوں میں نمایاں اضافہ کیا ہے جس سے پاکستان جیسے تیل درآمد کرنے والے ملک کو مہنگائی کے براہِ راست اور بالواسطہ خطرات کا سامنا ہے۔

(جاری ہے)

معلوم ہوا ہے کہ عالمی منڈی میں برینٹ، ڈبلیو ٹی آئی اور عرب لائٹ سمیت اہم عالمی خام تیل کے نرخوں میں ہفتہ وار 10 سے 12 فیصد تک اضافہ ہوچکا ہے، اس لیے یہی امید ظاہر کی جارہی تھی کہ اسٹیٹ بینک کی جانب سے موجودہ صورتحال میں احتیاط برتی جائے گی کیوں کہ مشرقِ وسطیٰ میں کشیدگی اور امریکہ چین ممکنہ تجارتی معاہدے کو دیکھتے ہوئے خام تیل کی قیمتیں ایک بار پھر سے 68 تا 70 ڈالر فی بیرل تک پہنچ چکی ہیں۔

دوسری طرف صدر ایف پی سی سی آئی عاطف اکرام شیخ نے شرح سود میں 400 بیسس پوائنٹس کمی کا مطالبہ کرتے ہوئے کہا تھا کہ افراط زر میں کافی حد تک کمی واقع ہوچکی جو اس وقت کم ترین سطح پر آ گئی ہے، مہنگائی کی شرح میں کمی کے باعث پالیسی ریٹ 7 فیصد پر لانے کی گنجائش ہے، مہنگائی میں کمی کے باوجود بلند شرح سود کاروباری سرگرمیوں کے فروغ میں رکاوٹ ہے، معاشی اعشاریے مثبت، مہنگائی میں کمی کا فائدہ عام آدمی تک پہنچانا ضروری ہے، شرح سود میں 4 فیصد کمی سے بینکوں میں پڑے ہوئے پیسے صنعتوں میں لگیں گے، پیسے کی سرکولیشن بڑھنے سے ملک میں روزگار کے نئے مواقع پیدا ہوں گے۔