خیبرپختونخوا،سیکیورٹی فورسز کے 2 انٹیلی جنس بیسڈ آپریشنز، بھارتی حمایت یافتہ 5 خوارج ہلاک

پیر 16 جون 2025 18:07

اسلام آباد (اُردو پوائنٹ اخبارتازہ ترین - این این آئی۔ 16 جون2025ء)سیکیورٹی فورسز نے 15 اور 16 جون کے دوران خیبر پختونخوا میں بھارتی حمایت یافتہ فتنہ الخوارج کے خلاف 2 انٹیلی جنس بیسڈ آپریشنز کیے، اس دوران 5 خوارج مارے گئے۔

(جاری ہے)

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے بھارتی حمایت یافتہ فتنہ الخوارج کی موجودگی کی اطلاع پر پشاور میں آپریشن کیا، سیکیورٹی اہلکاروں کی مؤثر کارروائی میں 4 خوارج مارے گئے، ان میں خارجی حارث اور خارجی بصیر بھی شامل ہیں۔

دوسری جانب شمالی وزیرستان میں ایک اور انٹیلی جنس بیسڈ آپریشن کے نتیجے میں مزید ایک خارجی مارا گیا۔ہلاک ہونے والے خوارج سے اسلحہ، گولیاں اور دھماکا خیز مواد بھی برآمد ہوا، دہشت گرد خوارج دہشت گردی کی متعدد کارروائیوں میں ملوث تھے۔آئی ایس پی آر کے مطابق سیکیورٹی فورسز ملک سے بھارتی اسپانسرڈ دہشت گردی کی لعنت کو ختم کرنے کے لیے پرعزم ہیں۔