عمران خان کے بیانیے نے عوامی مقبولیت حاصل کی ہے جسے ختم نہیں کیا جا سکتا ،علی امین گنڈاپور

 پشاور(اردوپوائنٹ اخبار تازہ ترین۔17جون 2025)وزیراعلیٰ خیبرپختونخواہ علی امین گنڈاپور نے کہا ہے کہ عمران خان کے بیانیے نے عوامی مقبولیت حاصل کی ہے جسے ختم نہیں کیا جا سکتا، بانی پی ٹی آئی کی رہائی اور بڑی سیاسی تحریک کیلئے کارکنان کو متحرک کر رہے ہیں،ہم عمران خان کے وژن کے مطابق آزادی صحافت پر مکمل یقین رکھتے ہیں،وزیراعلیٰ خیبرپختونخواہ علی امین گنڈا پور سے کونسل آف پاکستان نیوز پیپرز ایڈیٹرز کے وفد نے ملاقات کی اور انہیں سرپلس بجٹ پیش کرنے پر مبارکباد پیش کی۔

بانی پی ٹی آئی سیاسی قیدی ہیں ان کی رہائی کیلئے سیاسی تحریک جاری رکھیں گے۔اس بار بڑی سیاسی تحریک کیلئے کارکنان کو متحرک کر رہے ہیں اور اس کیلئے مقامی سطح پر جلسے منعقد کئے جا رہے ہیں۔ ملاقات میں اخبارات کو درپیش مسائل اور اشتہارات کی مد میں واجبات کی ادائیگی سے متعلق گفتگو اور صوبائی حکومت کی کارکردگی سے متعلق بھی تبادلہ خیال کیا گیا۔

(جاری ہے)

اس موقع پر گفتگو کرتے ہوئے علی امین گنڈاپور کاکہنا تھا کہ آزادی صحافت اور اخباری صنعت کی ترقی میں سی پی این ای کا اہم کردار رہا ہے، اشتہارات کی مد میں بقایاجات کی ادائیگیوں کیلئے ترجیحی بنیادوں پر اقدامات کئے جائیں گے۔سوشل و ڈیجیٹل میڈیا کے دور میں بھی اخبارات کی اہمیت سے انکار ممکن نہیں۔انہوں نے کہا کہ خیبر پختونخوا ہ حکومت نے آئی ایم ایف کے 100 فیصد اہداف پورے کئے۔

گزشتہ 15 ماہ میں ہم نے ٹیکس اور نان ٹیکس ریونیو میں 50 فیصد اضافہ کیا۔ صنعتوں کو مقامی سطح پر پیدا ہونے والی بجلی رعایتی نرخوں پر فراہم کریں گے۔ صوبائی پاور ٹرانسمیشن لائن بچھانے کے منصوبے پر کام کر رہے ہیں۔ 3 سال میں صوبائی حکومت کے 800 میگاواٹ پن بجلی کے منصوبے مکمل ہوں گے۔ ایک لاکھ 32 ہزار مستحق گھرانوں کو مفت اور آدھی قیمت پر سولر سسٹم دے رہے ہیں۔

وزیراعلیٰ خیبرپختونخواہ نے کہا کہ جب ہم نے حکومت سنبھالی تو خزانے میں صرف 18 دنوں کی تنخواہ کے پیسے تھے، بہتر مالی نظم و ضبط اور مؤثر مانیٹرنگ کے ذریعے 250 ارب اضافی آمدن پیدا کی۔ صوبے کے اپنے محصولات 125 ارب روپے ہیں۔ قرض اتارنے کیلئے 150 ارب کا ڈیٹ منیجمنٹ فنڈ قائم کیا ہے۔ 15 سال میں منصوبے بروقت مکمل نہ ہونے پر لاگت اضافے سے 450 ارب نقصان ہوا۔

ترقیاتی پروگرام میں شامل منصوبے اگلے تین سالوں میں ہی مکمل کئے جائیں گے۔ ہم نے نہ صرف صحت کارڈ کو دوبارہ بحال کیا بلکہ اس کا دائرہ بھی وسیع کیا۔ صحت کارڈ کے تحت 71 فیصد علاج سرکاری اسپتالوں میں کروایا جاتا ہے۔نئے منصوبے کی بجائے جاری منصوبوں کی تکمیل پر توجہ دی گئی ہے۔ گزشتہ ایک سال کے دوران 541 ترقیاتی منصوبے مکمل کئے گئے۔