Live Updates

واضح حکم دے رہا ہوں اسٹیبلشمنٹ سے رابطے ختم کرو‘ آئندہ کسی سے رابطہ نہ کیا جائے، عمران خان

اگر اسٹیبلشمنٹ میں سے کسی نے بات کرنی ہے تو مجھ سے آکر اڈیالہ میں کرے، ملک کے حالات اس لیے ایسے ہیں کیوں کہ عاصم منیر اپنے اقتدار کو طوالت دینا چاہتے ہیں؛ سابق وزیراعظم کی جیل میں وکلاء سے گفتگو

ساجد علی پیر 22 ستمبر 2025 17:02

واضح حکم دے رہا ہوں اسٹیبلشمنٹ سے رابطے ختم کرو‘ آئندہ کسی سے رابطہ ..

راولپنڈی ( اُردو پوائنٹ اخبارتازہ ترین۔ 22 ستمبر2025ء ) پاکستان تحریک انصاف کے پیٹرن انچیف عمران خان کا کہنا ہے کہ علی امین گنڈاپور، بیرسٹر گوہر اور بیرسٹر سیف کو واضح حکم دے رہا ہوں کہ اسٹیبلشمنٹ سے رابطے ختم کرو، آئندہ کسی سے رابطہ نہ کیا جائے، اگر اسٹیبلشمنٹ میں سے کسی نے بات کرنی ہے تو مجھ سے آکر اڈیالہ میں کرے۔ راولپنڈی کی اڈیالہ جیل کے باہر میڈیا سے گفتگو کرتے ہوئے سابق وزیراعظم کی ہمشیرہ علیمہ خان نے کہا کہ عمران خان نے چار پیغامات بیجھے ہیں، پہلا پیغام کیس توشہ خانہ ٹو سے متعلق ہے، عمران خان نے کہا ہے یہ کیس پچھلے مہینے ہی ختم ہو جانا چاہیئے تھا لیکن نہیں ہوا، اب امید ہے دو تین سماعتوں بعد یہ کیس اس ہفتے ختم ہو جائے گا اور عمران خان بری ہو جائیں گے، 25 ستمبر کو القادر کیس کی اسلام آباد ہائیکورٹ میں سماعت ہیں وکلاء اور ہم سب ہائیکورٹ ہوں گے ہم امید کرتے ہیں کہ اس دن سماعت ہو جائے گی۔

(جاری ہے)

انہوں نے بتایا کہ عمران خان نے کہا ہے ملک کے حالات اس لیے ایسے ہیں کیوں کہ عاصم منیر اپنے اقتدار کو طوالت دینا چاہتے ہیں، 26 ویں ترمیم کر کے عدلیہ کو کوئی حکومتی محکمہ بنا دیا گیا ہے، آزاد ججز کو سلام پیش کرتے ہیں، عمران خان نے کہا عاصم منیر نے میری دو تہائی اکثریت چھین کر چوروں کو مسلط کیا تھا، محسن نقوی نے کرکٹ ٹیم کو ڈی سٹیبلائز کر دیا ہے، یہ ہی ٹیم تھی جس نے اکتوبر 2021ء میں انڈیا کو 10 وکٹوں سے شکست دی تھی۔

سابق وزیراعظم کا کہنا ہے کہ محسن نقوی کرکٹ ایسے ہی چلا رہا ہے جیسے عاصم منیر پاکستان کو چلا رہا ہے، دونوں کا ایک ہی حال کر دیا ہے، اب ایک ہی طریقہ ہے کرکٹ میچ جیتنے کا کہ اوپننگ بیٹسمین عاصم منیر اور محسن نقوی ہوں، امپائرز قاضی فائز عیسیٰ اور سکندر سلطان راجہ ہوں اور تھرڈ امپائر سرفراز ڈوگر ہوں اسی صورت پاکستان جیت سکتا ہے ورنہ کوئی طریقہ نہیں بچا۔