Live Updates

بد قسمتی سے ابتک حکومت نے سیلاب متاثرین کیلئے عالمی امداد کی اپیل نہیں کی،بلاول بھٹو

پیر 22 ستمبر 2025 18:24

کراچی(اُردو پوائنٹ اخبارتازہ ترین - این این آئی۔ 22 ستمبر2025ء)چیئرمین پاکستان پیپلز پارٹی بلاول بھٹو زرداری کا کہنا ہے کہ بد قسمتی سے اب تک حکومت نے سیلاب متاثرین کے لیے عالمی امداد کی اپیل نہیں کی ہے، عالمی سطح پر امداد کی اپیل کرنا سیلاب متاثرین کا حق تھا، ایک بار پھر حکومت سے مطالبہ کرتا ہوں کہ بی آئی ایس پی پروگرام کے ذریعے متاثرین کی امداد کی جائے۔

کراچی میں میڈیا سے گفتگو میں انہوں نے کہا کہ کراچی میں پانی کے مسئلے کا حل نکالنا ہے، امید ہے کہ وزیرِ اعظم کراچی کو شہباز اسپیڈ دینے کا وعدہ پورا کریں گے۔بلاول بھٹو زرداری نے کہا کہ قدرتی آفت کے دوران سیاست نہیں کرنا چاہیے، سیلاب سے سب سے زیادہ جنوبی پنجاب کے عوام متاثر ہوئے ہیں، سندھ کے بھی کچے کے علاقوں میں لوگ سیلاب سے متاثر ہوں گے۔

(جاری ہے)

انہوں نے مطالبہ کیا ہے کہ سیلاب سے متاثرہ علاقوں میں عوام کے بجلی کے بل معاف کیے جائیں، بی آئی ایس پی پروگرام متاثرین کو امداد دینے کا شفاف ترین پروگرام ہے۔بلاول نے کہاکہ کراچی میں واٹر ٹریٹمنٹ پلانٹ لگائے جا رہے ہیں، سیوریج ٹریٹمنٹ کے منصوبے پر کام کر رہے ہیں، ٹریٹمنٹ پلانٹس سے یہ پانی جلد صنعتوں کو بھیجا جائے گا، اس منصوبے سے صاف پانی شہریوں کو دیا جا سکے گا۔

انہوں نے کہا کہ سندھ حکومت اور کے ایم سی مل کر مسئلے کا حل نکالیں گے، حب کینال سے شہر کی ضرورت کو بڑھایا ہے، وزیرِ اعلی، وزیرِ بلدیات اور میئر جلد سے جلد منصوبے کو مکمل کریں۔بلاول بھٹو نے کہا کہ صدرِ پاکستان وفاق کی نمائندگی کرتے ہیں، صدر زرداری وہ پہلے صدر ہیں جنہوں نے سب سے زیادہ چین کے دورے کیے ہیں، پیپلز پارٹی اور مسلم لیگ ن، سندھ حکومت اور وفاق کے درمیان بات ہوتی ہے۔

انہوں نے کہا کہ سیلاب متاثرین نے ہم سے بجلی کے بلوں میں ریلیف کی اپیل کی تھی، پاکستان اور سعودی عرب کے درمیان معاہدہ قابلِ تعریف ہے۔چیئرمین پاکستان پیپلز پارٹی نے کہا کہ پاکستان اور سعودی عرب دفاعی معاہدے پر وزیرِ اعظم اور ان کی ٹیم کو مبارک باد دیتا ہوں۔بلاول بھٹو نے کہا کہ اسپورٹس کو غیر سیاسی رکھا جائے، بھارت کھیلوں میں ہمیشہ سیاست کرتا ہے۔